Андижон вилоятининг Шаҳрихон туманидаги 64-ихтисослаштирилган давлат умумтаълим мактабининг тарих фани ўқитувчиси ушбу муассасанинг 10-синф ўқувчиси А.И.ни калтаклагани ҳақида хабар тарқалди. Воқеа тафсилотини ўрганган «Дарё» мухбири билан суҳбатлашганларнинг айтишича, бунга ўқувчининг синфдош қиз расмини интернетда тарқатгани сабаб бўлган.
Ўқувчини калтаклаган ўқитувчининг айтишича, унда болани тартибга чақириб қўйиш истаги бўлган ва у билан суҳбат ўтказган. Аммо ўқувчининг гап қайтариши ортидан жаҳли чиқиб, ўзини ушлаб туролмаган.
«Бу ўқувчи билан бундай вазият юзага келиши биринчи маротаба эмас, бу аввал ҳам бўлган. Ўзи мактабга кам келади. Олдинлари ҳам у билан шунга ўхшаш муаммолар бўлган-да, ўқитувчилар томонидан тартибга чақирилган эди. Аввалроқ ҳамкасбимизнинг қизи сурати ҳам ижтимоий тармоқларда тарқатилгани, бу ҳолатдан қизнинг аҳволи ёмонлашгани, синфдошлари орасида турли гап-сўзларга қолгани, аёлнинг ўзига ҳам 10-синф ўқувчилари ‘интернетга кирмаяпсизми, кирсангиз қизингизнинг расмларини кўриб оласиз’, дея пичинг ҳам қилишганини эшитгандим. Аввалига ўқитувчига бундай гапларни айтаётган болани тартибга чақириб қўймоқчи бўлдим. Кейин ўзимга ҳам бир неча бор гап қайтаргани учун жаҳлим чиқиб, ўзимни ушлаб туролмасдан уриб юбордим. Ўшанда хона улар айтгандек қулфланмаган эди», — дейди ўқитувчи.
Мактаб директорининг маънавий-маърифий ишлар бўйича ўринбосари Анвар Аъзамжоновнинг айтишича, ўқувчи ва унинг ота-онаси билан олиб борилган тушунтириш ишларига қарамасдан ҳеч қандай натижа бўлмаган.
«Ушбу ўқувчимиз билан аввал ҳам бир неча бор тушунтириш ишлари олиб борилган. Негаки, унда кўп бора дарсларга кеч қолиш ёки умуман келмаслик, келса ҳам ўқув қуролларини тўлиқ олиб келмаслик, дарсдан кетиб қолиш ҳолатлари кузатилган. Ўқувчимизнинг ота-онасини ҳам чақиртириб, тушунтириш ишлари олиб борилганига қарамасдан бу ҳолатлар такрорланиб келмоқда. Тенгдошларига нисбатан шўхроқ, ўқитувчи танбеҳ берганда хўп деса ҳам ўз билганидан қолмайдиган бола. У телефондан фойдаланмаслик тўғрисида ҳам огоҳлантирилган, аммо фойдаси бўлмаган», — дейди Анвар Аъзамжонов.
Мактабнинг физика фани ўқитувчиси Миродил Жўраевнинг маълум қилишича, ўқувчи мактабга ҳайдовчилик гувоҳномасисиз отасининг машинасида келиб-кетади. Бундан ташқари мактабдаги қизларни суратга олиб синфдош дўстларига тарқатаётгани ҳақида ҳам бир неча бор шикоятлар келиб тушган.
«У бола ҳақида қисқача айтадиган бўлсам, унинг ўқишлари яхши эмас. Чунки, дарсларга кирмайди. Дарсга киришини айтган ўқитувчиларга қўполлик қилади. Баъзан мактабга вояга етмагани ва ҳайдовчилик гувоҳномаси йўқлигига қарамай отасининг машинасини миниб келади. Биз бир неча марта мактабга машина миниб келмаслигини айтганмиз. Барибир гапимизга кирмайди. Бундан ташқари мактабдаги қизларни суратга олиб синфдош-дўстларига тарқатаётгани ҳақида ҳам бир неча бор шикоятлар келиб тушган. Шундан сўнг, ота-онасини мактабга чақирганмиз, ҳатто тоғаси ҳам келган. Уларга фарзандининг мактаб сумкасини ҳам кўрсатганмиз. Деярли китоблари ва дафтарлари тўлиқ эмаслигини ўз кўзлари билан кўришган. Ўғлининг шу ҳолатда 10-синфда ўқиётгани, бунга интизомий чора кўришлари кераклиги ҳақида тушунтирганмиз. Ўшанда ота-онаси анчагина ваъдалар бериб кетганди. Бироқ вазият ўзгармади. Охир-оқибат шу кўнгилсиз воқеа юз берди», — дейди Миродил Жўраев.
Шу бола ўқиётган синфга вақтинча синфга раҳбарлик вазифасини бажараётган Муроджон Ғофуровнинг айтишича, ўқувчи кўп бора огоҳлантирилган, бироқ ўз билганидан қолмаган.
«Бир ярим ойдан бери шу синфга вақтинча синф раҳбарлик қилиб келяпман. Бу синфдаги болалар ўта шўх ва бетартиб бўлиб кетгани учун синф раҳбарликни менга беришганди. Ҳаттоки, синфдаги бир неча бола ўқишни ташлаб, Тошкентга кетиб юборган экан. Уларни чақиртирдим. Орадан 15-20 кунлар ўтгач, бу ўқувчининг тоғаси уйимга келиб, имкон бўлса уни яна Тошкентга олиб кетишларини, мебель цехида ишлаши кераклигини, барибир мактабда ҳам ўқимаётганини айтди. Мен эса бунинг имкони йўқлигини билдирганман. Шунда тоғаси ‘Агар қандайдир йўл-йўриқ бўлса бажарамиз’, деган. Қатъий рад жавобини берганман. Ўз кўзим билан кўрмаганман-у, лекин эшитишим бўйича кечалари ичкилик ичиб олиб бир неча дўстлари билан машина миниб юрар экан. Шахсан ўзим кўп бор огоҳлантирганман. Бу юришингни йиғиштир деганимда ‘Хўп, домла. Бошқа қайтарилмайди’, дейди, аммо юраверади», — дейди Муроджон Ғофуров.
«Дарё» мухбири Шаҳрихон туман марказий шифохонасига бориб, ўқувчи ва унинг онаси билан гаплашишга уринган. Аммо ўқувчининг онаси бошқаларга интервью бериб бўлганлигини, ўғлининг ҳали ёш эканлигини, гап сўз бўлишини истамаслигини айтиб, саволга жавоб беришдан бош тортган.
Вилоят халқ таълими бошқармаси ахборот хизматининг маълум қилишича, ҳолат мактабнинг педагогик жамоаси иштирокида ўрганиб чиқилган. Ўрганиш якунлари бўйича ўқитувчига интизомий жазо чораси қўлланилган.
Изоҳ (0)