Андижон вилояти Избоскан туманидаги мактаблардан бирида ўқитувчи дарсга кеч қолиб келган ўқувчига икки литр ариқ сувидан ичириб жазолади, деб хабар берилди «Замон» информацион дастурида.
Айтилишича, 6-синф ўқувчиси дарсга кечикиб кирган ва ўқитувчига қўпол муомалада бўлган. Ўқитувчи эса уни 2 литр ариқ суви ичириб, нок баргини ейишга мажбурлаган.
«Ўша кун мактабда навбатчи сифатида эшик тагида ўтирган эдим. У ўқувчи 2-соат охирига кеч қолиб келди. Сабаби сўралганда гап қайтарди. Ўзимнинг қариндошим экани сабабли унга ўзингни бос деган мақсадда 100 грамм ёки бир пиёлача сув ичирганман. Бу ердаги бошқа гаплар қаердан келяпти, буни билмайман. Нок дарахти бор, лекин бунақа нарса қилинмаган. Масалан, ўшани ўқувчига мажбурлаб берса ҳам, ютмайди-да у нарсани. Мен мажбурлай олмайман-ку, тўғрими? Бу нарсани айтишдан олдин сал ўйлаш керак», — деган ўқитувчи.
Қайд этилишича, дарсга кечиккан ўқувчи Б. ва уни жазолаган домла Ш. ўзаро қариндош бўлган. Воқеага жабрланувчининг синфдошлари ҳам гувоҳ бўлган.
«Ҳамма бир-бирига сув сепиб ўйнаётганди. Домла ‘мана шу сувни ичасан’, деб ичириб юборди. У (жабрланган ўқувчи — «Дарё» изоҳи) сув сепмаганди, ўша пайт далада иш қилиб келаётган экан», — деган ўқувчилардан бири.
«Кечирим сўраттириб, докторга олиб борамиз деди. Ўзи олиб кетди шифохонага. У ерда шифокорлар ҳеч қандай муолажа шартмаслигини, яхши бўлиб кетишимни айтди», — дейди жабрланган ўқувчи.
Эслатиб ўтамиз, Андижондаги мактаблардан бирида ўқитувчи ўқувчи қизни калтаклаганди, ўқувчи қиз эса ўзини ҳимоялаш учун ўқитувчига қаршилик кўрсатган. Кейинчалик калтакланган ўқувчи қизлар воқеа сабаби ҳақида гапириб берган. Қайд этилишича, синф раҳбари дарсга кеч қолган, шу сабаб болалар мактабдан кетиб қолган.
Аввалроқ Сирдарёда мактаб ўқувчисининг яқинлари директор ўринбосари ва ўқитувчини калтаклагани айтилганди.
Изоҳ (0)