«Дарё» ва унинг ижтимоий тармоқлардаги саҳифаларида Наманган шаҳридаги мактаблардан бирининг ўқитувчиси ўқувчини аёвсиз калтаклагани акс этган видео эълон қилинди. «Дарё» мухбири Азизбек Абдувалиев воқеа жойига бориб, вазиятга аниқлик киритишга уринди.
Мазкур воқеа жорий йил 13 октябрь куни Наманган шаҳрининг Давлатобод туманидаги 58-давлат ихтисослаштирилган умумтаълим мактабида рўй берган. Мактабнинг 5-синфида ўқийдиган қизлар синф раҳбарлари бўлган география фани ўқитувчисига синфдош бола устидан шикоят қилади. Педагог болага танбеҳ берган пайт орадан гап қочади. Шундан сўнг 27 яшар ўқитувчи йигит ҳиссиётлари ва қўлига эрк беради.
Бу ўқитувчини ишга олганимизга роса бир йил бўлганди. Олдинги фаолият олиб борган жойларидан яхши тавсиялар беришган, қолаверса, ўзимизда психолог билан суҳбатдан ўтган. Бу синфни ўқув йили бошида қабул қилиб олган ва ҳозиргача ҳаммаси яхши кетаётганди. Синфдош қизлар ва боланинг ўртасидаги можарога аралашганидан сўнг шундай хунук ҳолат юз берган. Калтакланган боланинг синглиси ҳам шу мактабда ўқийди. Уларнинг ота-онасидан ўзим ҳам, ўқитувчи йигит ҳам қайта-қайта кечирим сўрадик. Чунки ўзимизнинг ҳам фарзандларимиз бор, бўлиб ўтган воқеадан ота-она қанчалик даражада ранжиганини жуда яхши тушунамиз, — дейди мактаб директори Қобилжон Мирзабоев.
Қайд этиш жоизки, 58-давлат ихтисослаштирилган умумтаълим мактаби Намангандаги энг нуфузли мактаблардан бири саналади. Ўтган ўқув йилидаги мактаблар рейтингда мамлакат бўйича 5-ўринни эгаллаган.
Мактабдаги ўқитувчиларнинг 40 фоизи олий тоифали педагоглар, ўқувчилар эса Косонсой, Учқўрғон, Поп каби чекка туманлардан ҳам келади. Битирувчиларнинг олий таълимга кириш қамрови бўйича ҳам вилоятда юқори ўринларни бирини эгаллайди.
Бўлиб ўтган воқеадан ўзим ҳам, мактаб жамоаси ҳам шок ҳолатида. Чунки ўқитувчи ҳеч қачон тажовузкор кайфиятда бўлмаган, ўша вазиятда ўзини бошқаролмагани учун минг пушаймон. Биз ўзимиз ҳам қаерда қандай хато ўтганини қайта-қайта таҳлил қиляпмиз. Ўша кундан бери тинчимиз бузилган, кимга нима дейишни билмаймиз. Чунки юз берган ҳолат педагогнинг касб этикасига мутлақо тўғри келмайди. Ўқувчи барибир ўқувчи, бола барибир бола. Шундай нуфузли даргоҳга ярашмайдиган ва мактаб тарихида умуман кузатилмаган ҳодиса юз берди. Бундан ниҳоятда афсусдамиз, — дейди директор.
Наманган шаҳар ИИО ФМБ вояга етмаганлар ва ёшлар билан ишлаш гуруҳи катта инспектори, подполковник Гулида Обидованинг айтишича, мактабда юз берган воқеа юзасидан мурожаат келиб тушган заҳоти таълим муассасасига келиб, ўқитувчи ва жабрдийда боланинг ота-онаси билан суҳбатлашган, вазиятни ўрганган ва муҳокама йиғилиши ўтказган. Тўпланган материаллар эса тергов гуруҳига тақдим этилган. Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
Изоҳ (0)