Самарқанд вилоятининг Ургут туманида мактаб директори 12 ёшли ўқувчини уриши оқибатида унинг қулоқ пардаси йиртилди. Бу ҳақда Zo‘r TV телеканалининг «Бу кун» информацион дастурида хабар берилди.
Маълум қилинишича, ўқувчилар ўтирган синфхонада болалар томонидан пақилдоқ портлатилган. Шундан сўнг мактаб директори келиб ўқувчилардан бирининг қулоғига шапалоқ туширган. Жароҳатланган ўқувчи шифохонага олиб борилган. Шифокорнинг сўзларига кўра, зарба оқибатида боланинг қулоқ пардаси тешилган.
Айтишларича, жабрланган боланинг умуман айби бўлмаган. Синфхонада портлатилган пақилдоқ мактаб ошхонасидан сотиб олинган. Яқинда таъмирдан чиқарилган мактабда замонавий кузатув камералари ҳам ўрнатилган, бироқ тасвирлар қасддан ўчириб юборилган.
Мактаб директори ўринбосари эса камералар ишлаётгани, ўша кунги тасвирлар ҳам борлигини айтган.
Самарқанд вилояти ИИБ матбуот котибининг билдиришича, ҳолат юзасидан Ургут тумани ИИБ томонидан терговга қадар текширув ҳаракатлари олиб борилмоқда.
Мавзуга доир:
Изоҳ (0)