Ijtimoiy tarmoqlarda Oltinko‘l tumani “Qoraqalpoq” mahallasida joylashgan 38-umumta’lim maktab direktorining maktab o‘quvchilarini kaltaklayotgani aks etgan videolavha tarqaldi. Holat yuzasidan Andijon viloyat maktabgacha va maktab ta’lim boshqarmasi rasmiy ma’lumot berdi.
“Daryo” muxbiri voqea tafsilotlariga aniqlik kiritish maqsadida maktab direktori Manzura Mahkamova bilan bog‘landi.
“Shu maktabda 1990-yildan beri ishlayman. Avval o‘qituvchi, so‘ngra maktab direktorining ma’naviy masalalari bo‘yicha o‘rinbosari bo‘lib ishlaganman. 2013-yildan buyon esa maktab direktori vazifasida mehnat qilib kelyapman.
Maktabimizda 495 nafar o‘quvchi tahsil oladi. Ularga 43 nafar pedagog ta’lim-tarbiya berib kelmoqda. 5-sinfdan 8-sinfga qadar bo‘lgan sinflar ikkinchi, qolgan sinflar esa birinchi smenada o‘qishadi”, deydi direktor.
Maktab direktori voqea haqida so‘zlab, o‘quvchi boshqa o‘quvchilarga nisbatan zug‘um qilib kelishini va hattoki sinfni tutatib yuborganini bildirgan.
“Shu kunga qadar o‘quvchilarni hattoki urishmasdim. Agar ishonmasangiz, jamoa va ota-onalardan so‘rashingiz mumkin. Kaltak yegan o‘quvchi 8-sinfda o‘qiydi — darslarga qatnashmaydi, ota-onasi tarbiya bermaydi, desam ham bo‘ladi. Bu bola barcha o‘quvchilarga zug‘um qilib, nafsoniyatiga tegib keladi.
Endi holat haqida gapiradigan bo‘lsam, voqea 30-oktyabr kuni yuz bergan. O‘sha kuni ota-onalardan biri kelib, shu bola farzandiga zug‘um qilayotganligini, bir kun avval qo‘liga pirotexnika vositasini berib, majburlab ottirganini, bir oy avval esa suvga bo‘ktirganini aytib shikoyat qildi. Agar biror joyiga bir narsa bo‘lsa, nima bo‘lardi, dedi.
Ota-onaning vaji haqiqatan isbotlandi. Shunda bolalar oldimda edi: boshqalarning oldida odam ajratyapti, degan gap bo‘lmasin deb ozgina jazoladim. Lekin unaqa qattiq urganim yo‘q. Agar sinchiklab videoni ko‘rsangiz, ko‘zidan birorta yosh chiqqanini ko‘rmaysiz”, deydi Manzura Mahkamova.
Ta’kidlanishicha, aslida video bir soat olingan. Unda ota-onalar va o‘qituvchilarning fikrlari ham yozilgan. Biroq faqat direktorga oid qismigina ijtimoiy tarmoqlarda tarqatilgan.
“Aslida video bir soatli. Uni maktabimizning musiqa fani o‘qituvchisi ortimdan turib, yashirib olgan ekan. Videoni qirqib, faqat menga oid joylarini qoldirishgan. Vaholanki, bu yerda boshqa o‘qituvchilar, sinf rahbarlari va ota-onalar gapirgani ham bor edi.
Maktabdagi barcha o‘quvchilarni o‘z farzandimdek ko‘raman. O‘sha kuni xona shunaqangi tutab ketdiki, 4 soat dars o‘tilmadi. Pirotexnika shunday narsa ekanki, bitta yonib o‘chadigan emas, tepaga chiqib, tutaydigan ekan. Avvaliga xonaga kimdir o‘t qo‘yib yubordimikan deb, qo‘rqib ketdim. Uchta o‘qituvchim hididan zaharlanib, uch kundan beri mazasi yo‘q, nafasi qisyapti”, deydi maktab direktori.
Manzuraxon Mahkamova suhbat so‘ngida ishdan bo‘shash to‘g‘risida ariza yozib berganini bildirib, uyida farzandiga tarbiya bermayotgan ota-onalarga ham jazo choralari qo‘llanilishi lozimligini qayd etgan.
“Shuncha yil ishlab bunaqa holat yuz bermagandi. Asli rahbarlikka havasmand emasman — o‘zimga yarasha obro‘-e’tiborim, hurmatim bor. Shuncha yil qanday ishlaganimni xalq biladi. Lekin haqiqat egiladi, bukiladi, sinmaydi. Ammo shunday bo‘lsa-da o‘z xohishimga ko‘ra, ishdan bo‘shash to‘g‘risida bugun boshqarmaga yozib berdim.
Ota-onalardan ham farzandlariga to‘g‘ri tarbiya berishlarini so‘rab qolardim”, deydi Manzura Mahkamova.
Izoh (1)
Bolani Axloq tuzatish koloniyasiga junatish kerak. Direktorni ishiga tiklash kerak.