Самарқанддаги мактабда ўқитувчи ўқувчи болани уриб, синфдан чиқариб юборгани акс этган видео тарқалганди. Самарқанд вилояти халқ таълими бошқармаси видеода содир бўлган воқеага аниқлик киритди.
Маълум қилинишича, воқеа 16 декабрь куни Самарқанд шаҳридаги 21-умумтаълим мактабида география дарсида содир бўлган. Ҳолат юзасидан 21-умумтаълим мактабининг навбатдан ташқари педагоглар кенгаши ўтказилган. Кенгаш баённомасига кўра, ўқитувчи С.Ҳ. география дарсида копток тепиб ўйнаб ўтирган ўқувчи Д.Э.ни дарсга халақит бермаслиги юзасидан бир неча бор огоҳлантирган ва синф хонасидан чиқариб юборган.
Шундан сўнг ўқувчи синфга деразадан кириб ўқитувчини сенсираб ҳақорат қилган. Ушбу ҳолатдан кейин ўқитувчи ўзини тўхтата олмай, болани калтаклаган.
Ҳолат юзасидан ўқитувчига халқ таълими вазирининг 2022 йил 28 июнда қабул қилинган «Умумий ўрта таълим муассасаларининг ички тартиб ва одоб-ахлоқ қоидалари»ни қўпол равишда бузганлиги учун ҳайфсан интизомий чораси қўлланган.
Вилоят халқ таълими бошқармаси ишчи гуруҳи ўқитувчи ва ўқувчининг онаси билан алоҳида-алоҳида суҳбатлашган. Суҳбат давомида ўқитувчи бундай ҳолат бошқа қайтарилмаслигини, ўз ишидан пушаймонлигини билдирган. Ўқувчининг онаси эса боласининг шўхлигини таъкидлаб, ҳеч кимга даъвоси йўқлигини маълум қилган.
Мавзуга доир:
Изоҳ (0)