“Юз қисмига урган, оқибатда директор ўринбосари йиқилиб тушиб, бош мияси жароҳатланган”. Вобкент ҳокимлиги калтакланган ўқитувчи масаласига аниқлик киритди

“Дарё”да “Бухорода мактаб директорининг ўринбосари калтакланди. Жабрланувчи шифохонанинг жонлантириш бўлимига ётқизилгани айтилмоқда” сарлавҳали мақола эълон қилинганди. Вобкент тумани ҳокимлиги мазкур ҳолатга аниқлик киритди.

2023 йилнинг 31 август куни соат 10:00 атрофида Вобкент туманидаги 5-умумий ўрта таълим мактабининг олий тоифали жисмоний тарбия фани ўқитувчиси 1974 йилда туғилган фуқаро Э.У. мактаб директорининг ўқув ишлари бўйича ўринбосари 1975 йилда туғилган фуқаро Г.Ш. билан мактабда дарс соатларини дарс жадвалига жойлаштириш масаласида тортишиб қолиб, норозилиги туфайли унинг юз қисмига икки маротаба урган. Оқибатида директор ўринбосари мактаб ҳовлисида йиқилиб тушиб, бош мияси жароҳатланган. Беморга тиббий тез ёрдам кўрсатилиб, ҳозирги кунда Вобкент туман марказий касалхонасининг жонлантириш бўлимида даволанмоқда, — дейилади ҳокимлик муносабатида.  

Қайд этилишича, ҳолат юзасидан Вобкент туман ИИБ Тергов бўлими томонидан Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилган.