Бухорода мактаб директорининг ўринбосари калтакланди. Жабрланувчи шифохонанинг жонлантириш бўлимига ётқизилгани айтилмоқда

Бухоро вилоятининг Вобкент туманидаги 5-сонли умумтаълим мактабида директор ўринбосари бошқа ўқитувчи томонидан калтакланди. Жабрланувчи шифохонага ётқизилган. Бу ҳақда “Дарё”га билдирган манбага кўра, ўқитувчи шифохонанинг жонлантириш бўлимида қолмоқда. 

Бухоро вилоят ИИБ ахборот хизмати раҳбари Шуҳрат Жалолов “Дарё” сўровига жавобан, воқеани тасдиқлади. Ва ҳолат юзасидан жиноят иши қўзғатилганини маълум қилди. 

Қайд этилишича, мактаб директорининг ўринбосари жисмоний тарбия ўқитувчиси томонидан калтакланган. 

Воқеага айнан нима сабаб бўлган. Бу ҳақда менда ахборот йўқ. Лекин воқеа юзасидан Вобкент туман ИИБ Тергов бўлими томонидан Жиноят кодексининг 104-моддаси (қасддан баданга оғир шикаст етказиш) билан жиноят иши қўзғатилган, — дейди вилоят ИИБ ахборот хизмати раҳбари Шуҳрат Жалолов. 

Манбанинг қўшимча қилишича, мактабнинг жисмоний тарбия ўқитувчиси бокс билан шуғулланган бўлган. 

Жисмоний тарбия ўқитувчиси У.Э. боксчи бўлган. Дарс тақсимотидаги келишмовчилик сабаб, у директорнинг ўқув ишлари бўйича ўринбосарини калтаклаган. Ўқитувчининг аҳволи оғир. Вилоят прокурорига ўқитувчилар футболда жанжаллашиб қолишган деб, маълумот киритишган, — дейди манба.