Тошкент шаҳар Юнусобод туманидаги мактабларнинг бирида ўқувчи йигит ўз синфдошлари томонидан калтакланиб, операция қилингани айтилмоқда.
Жабрланувчининг сўзларига кўра, воқеа дарс вақтида содир бўлган. Уч синфдоши уни калтаклагач, ҳушини йўқотган. Сув сепиб, ҳушига келтирилганида эса унга шифокор чақирилмаган ҳам. У шифокор чақириб беришларини илтимос қилган. Шунингдек, мактаб маъмурияти ҳам унинг устидан кулганини таъкидлаган.
“Мактабга бордим. 3-соат эди. Бир синфдошим келиб устимдан кулди ва юзимга шапалоқ урди. Иккинчиси келиб, урди ва мени ушлаб олди. Учинчиси орқамдан темир билан уриб ташлади. Кейин ҳушимни йўқотди. Доктор чақиринг, десам чақириб беришмади. Кейин мактаб маъмурияти ҳам чиқиб, устимдан кулди. Эркаксан-ку, ўзингни босиб ол, уйдагиларингни чақирмаймиз, шу ерда тузатамиз сени, деди. Операция бўлдим, кўзимнинг тагида ҳам темирлар турибди. Бирортаси ҳам келиб ҳол-аҳвол сўрамади”, — дейди жабрланувчи.
Калтаклагани айтилган йигитлар эса ўзлари ҳам унинг акалари томонидан калтакланганини айтмоқда. Мактаб маъмурияти ҳам ҳолатга муносабат билдирди.
“Суриштиришимиз натижасида бир-бирининг ўрнига ўтириб олгани учун жой талашишгани маълум бўлди. Мактаб жамоамиз иккала томоннинг ота-оналарини чақиртирдик, профилактик тушунтириш ишлари олиб борилди. Калтакланган бола урушқоқликка мойиллиги бор бола эмасди. Уч маротаба бориб хабар олдим”, — дейди мактаб ходими.
Ҳолат юзасидан шаҳар Ички ишлар бош бошқармаси муносабат билдирди. Унга кўра, ҳолат юзасидан Юнусобод тумани Ички ишлар органлари фаолиятини мувофиқлаштириш бошқармаси тергов бўлими томонидан Жиноят кодексининг 105-моддаси билан жиноят иши қўзғатилган.
Изоҳ (0)