Ўзбекистоннинг тўққизта ҳудудида сел келиши хавфи эълон қилинди

“Ўзгидромет” 8–12 май кунлари кутилаётган ёмғирлар сабаб республиканинг тоғолди ва тоғли ҳудудларида сел-сув тошқини ҳодисалари юзага келиши мумкинлиги ҳақида огоҳлантирди.

Қайд этилишича, Қашқадарё вилоятининг Яккабоғ, Деҳқонобод, Чироқчи, Китоб, Шаҳрисабз, Қамаши ва Ғузор туманларида, Сурхондарё вилоятининг Сариосиё, Узун, Олтинсой, Денов, Бойсун, Шеробод, Шўрчи, Қумқўрғон ҳамда Музработ туманларида сел келиши хавфи мавжуд.

Шунингдек, Самарқанд вилоятининг Ургут, Самарқанд, Булунғур, Нуробод, Қўшработ, Каттақўрғон, Пайариқ, Жомбой ва Иштихон туманларида, Навоий вилоятининг Хатирчи, Навбаҳор, Нурота, Конимех ва Кармана туманларида, Жиззах вилоятининг Зомин, Бахмал, Ғаллаорол, Шароф Рашидов, Фориш ва Янгиобод туманларида ҳам сел-сув тошқини ҳодисалари кузатилиши мумкин.

Хавф Тошкент вилоятининг Оҳангарон, Бўстонлиқ, Паркент, Пискент, Ўрта Чирчиқ ва Юқори Чирчиқ туманлари ҳамда Ангрен ва Олмалиқ шаҳарларига, Наманган вилоятининг Поп, Косонсой, Чортоқ, Чуст, Наманган ва Янгиқўрғон туманларига ҳам тааллуқли экани айтилди.

Бундан ташқари, Фарғона вилоятининг Сўх, Шоҳимардон, Фарғона ва Бешариқ туманларида, Андижон вилоятининг Андижон, Асака, Жалақудуқ, Қўрғонтепа, Пахтаобод, Избоскан, Хўжаобод ва Марҳамат туманлари ҳамда Хонобод шаҳрида ҳам сел келиши мумкинлиги билдирилди.

“Ўзгидромет” тоғолди ва тоғли ҳудудларда яшовчи фуқаролар, дам олувчилар ҳамда ҳайдовчилардан эҳтиёт чораларини кўришни сўради. Шунингдек, айрим ҳудудларда ёмғир сувлари тўпланиб, ҳудудларни сув босиши эҳтимоли ҳам борлиги қайд этилди.

Тошкент шаҳрида 3 май куни кучли ёғингарчилик оқибатида “Чорсу” метро бекатига сув тошганди. Шаҳар ҳудудларидаги ирригация ва дренаж тизимларининг ўз вақтида тозаланмагани ҳамда ортиқча юклама остида қолиши сабабли сув оқимлари айрим жойларда тўпланиб, метро бекати ҳудудига ҳам кириб келган.

Кейинчалик ҳокимлиги дренаж ва коллектор тизимлари бошқармаси сув тошқини ёпиб юборилган ирригация тармоқлари оқибатида содир бўлганини маълум қилган. ҳудудга махсус техникалар жалб қилинган. Ёпиб юборилган ирригация тармоқлари очилади, шунингдек янги ирригация тармоқлари ҳам барпо этилади.