АҚШ президентлигига Республикачилар партиясидан номзод Дональд Трамп Демократик партиядан номзод Камала Ҳаррис сайловда ғалаба қозонса, Россия ёки Хитой билан музокара олиб бора олмаслигини айтди. Унинг сўзларига кўра, Ҳаррис бунинг учун етарли салоҳиятга эга эмас.
“Камала Ҳаррис Россия ёки Хитой билан ядро уруши ҳақида гаплашишига ишонасизми? Йўқ, албатта! Бизни иқтисодий инқироздан олиб чиқишга ишонасизми? Йўқ! IQ даражаси ниҳоятда паст бўлган, жуда заиф ва қобилиятсиз одамга улкан ваколат беришдан кўра хавфлироқ нарса йўқ”, деди Трамп Висконсин штатидаги сайловчилар олдида қилган нутқида.
Бундан аввал Дональд Трамп Украинадаги жанговар ҳаракатларни тўхтатиш бўйича музокаралар олиб боришга қодир эканини бир неча бор таъкидлаган. Сентябрь ойида у Владимир Путин ва Владимир Зеленскийни яхши билишини ва уларни “келиштириши” мумкинлигини айтганди.
5 ноябрь куни АҚШда президентлик сайловлари бўлиб ўтади. Дональд Трамп Республикачилар партиясидан, Камала Ҳаррис эса Демократик партиядан номзод сифатида рўйхатга олинган. Турли идоралар ва оммавий ахборот воситаларининг сайловолди сўровлари номзодлар учун берилган овозлар сони бўйича минимал фарқларни кўрсатмоқда. 24 октябрь куни The Wall Street Journal ўтказган сўровда Трамп 47 фоиз, Ҳаррис эса 45 фоиз овоз олган.
Изоҳ (0)