Байден Бразилия президентини қўллаб-қувватлашга ваъда берди ва уни АҚШга таклиф қилди

Бразилиядаги норозилик намойишларидан сўнг АҚШ президенти Жо Байден бразилиялик ҳамкасби Лула да Сильва билан телефон орқали суҳбатда, Қўшма Штатлар мамлакат демократияси ва бразилияликларнинг эркинлигини  «сўзсиз қўллаб-қувватлашини» айтди. Бу ҳақда Оқ уй веб-сайтида хабар берилди.

Байден Бразилиядаги тартибсизликларни қоралади. У февраль ойи бошида ҳамкасбини Вашингтонга ташриф буюришга таклиф қилди, да Сильва таклифни қабул қилди.

Да Сильва, ўз навбатида, «президент Байденнинг ғамхўрлиги ва ҳамжиҳатлиги ҳамда демократияни мустаҳкамлаш учун икки мамлакат ўртасида доимий мулоқотни давом эттиришга тайёрлигини» қадрлаши ҳақида твит қолдирди.

АҚШ вице-президенти Камала Харрис эса мамлакатнинг Бразилиядаги янги элчиси Элизабет Баглининг қасамёдини қабул қилди.

8 январь куни Болсонару тарафдорлари президентлик сайлови натижаларини бекор қилишни талаб қилиб, президент қароргоҳи, Конгресс биноси ва Бразилиядаги Олий суд биносига бостириб кирганди. Кейинчалик расмийлар пойтахтдаги вазиятни назоратга олишга муваффақ бўлди. 1500 га яқин намойишчи қўлга олинди. Шаҳарда январь ойи охиригача фавқулодда ҳолат эълон қилинди.

Болсонару «бразилиялик Трамп» деб аталади, мамлакатдаги тартибсизликлар эса АҚШдаги президентлик сайловларида мағлуб бўлган Дональд Трамп тарафдорлари томонидан 2021 йил январда Капитолийга қилинган ҳужум билан таққосланмоқда.