АҚШ президентлигига демократ номзод Камала Ҳаррис интеллектуал қобилиятни аниқлаш тестини топширишга тайёрлигини билдирди ва ўзининг республикачи рақиби, АҚШнинг собиқ президенти Дональд Трампни ҳам ушбу тестни топширишга чақирди.
Аввалроқ Трамп Ҳарриснинг IQ даражаси жуда паст эканини айтган ва уни ақлий тестдан ўтишга чақирган эди. Собиқ президентнинг таъкидлашича, унинг рақиби интервьюлардан бирида энг оддий саволларга тўғри жавоб бера олмаган.
“Албатта. Мен ҳам уни худди шундай қилишга чақирардим. Лекин гап шундаки, у ҳақиқатдан ҳам борган сари беқарор бўлиб бормоқда. Аслида унинг Америка халқи учун режаси йўқ”, деди Ҳаррис CBS телеканалига берган интервьюсида.
У Трамп маъмуриятининг бир қатор собиқ юқори мартабали амалдорлари Трампнинг президент бўлишга нолойиқлигини айтганини таъкидлади.
Ҳаррис аввалроқ ўз тиббий ҳисоботини эълон қилган эди, унинг шифокори сиёсатчининг “саломатлиги аъло даражада” эканлигини тасдиқлаган. Ҳисоботда айтилишича, 60 ёшли Ҳаррис “жуда соғлом овқатланиш”га риоя қилади ва фаол ҳаёт тарзини олиб боради. Унинг апрель ойида ўтказилган сўнгги тиббий кўригида ҳеч қандай бузилишлар аниқланмаган.
Август ойида CBS News телеканалига ўзининг тиббий маълумотларини “бажонидил” эълон қилишини айтган 78 ёшли Трамп ўшандан бери бундай сўровларни бир неча бор рад этган.
“Трампнинг сўнгги пайтларда омма олдида чиқишлари борган сари чўзилиб кетди, бу эса когнитив пасайиш белгиси бўлиши мумкин”, деб ёзади Nеw York Times нашри.
Изоҳ (0)