Россия Федерал хавфсизлик хизмати (ФХХ) ходимлари 2019 йилдан 2024 йилгача мунтазам равишда Қора денгиз соҳилидаги Геленжик саройи ва Карелиядаги Марялахит кўрфазидаги қароргоҳ атрофида югуриш йўналишларини белгилаб келган. Бу ҳақда Strava фитнес иловаси маълумотларига таяниб, Le Monde нашри хабар берди.
Мазкур икки объект орасида деярли 2000 километр масофа мавжуд бўлса-да, уларни бир нарса боғлаб туради: Владимир Путиннинг қўриқчилари ушбу объектлар яқинида тез-тез пайдо бўлади, деб ёзади Le Monde очиқ маълумотларга асосланиб.
Сарой ва қароргоҳ Путиннинг шахсий мулки сифатида қаралади. Биринчи объект ҳақида россиялик мухолифатчи Алексей Навальний жамоаси 2021 йилда суриштирув ўтказган бўлса, иккинчиси ҳақидаги маълумотни “Досье” маркази 2024 йил январь ойида ошкор қилган.
Le Monde нашрининг қайд этишича, спорт иловаси орқали қўриқчилар ўз натижаларини ва геолокацияларини очиқ ҳолда эълон қилган. Уларнинг Қора денгиз ва Карелиядаги қароргоҳлар атрофидаги югуришлари Путин омма олдида кўринмаган ва унинг олдиндан ёзиб олинган чиқишлари Россия давлат телеканалларида эфирга узатилаётган пайтларга тўғри келган. Бироқ, журналистлар бу маълумотлар Россия президентининг айни вақтда шу жойларда бўлганига юз фоиз кафолат бермаслигини айтмоқда.
Strava иловаси Россия президентининг координаталарини бир неча бор фош қилган
Le Monde нашрига кўра, Strava иловаси орқали Россия президенти Владимир Путин иштирок этган учрашувларнинг жойлашуви аниқланган. 2019 йил 13–14 ноябрь кунлари Путин Бразилия пойтахтида БРИКС саммитида қатнашган. 11 ноябрь куни Россия президенти жойлашиши керак бўлган меҳмонхонада ФХХ ходими бўлган. Раҳбарининг келишини кутиб, у Strava иловасидаги маршрутга кўра, меҳмонхона кириш қисмида бошланиб, шу ерда тугайдиган югуришга чиққан.
Путиннинг Исроил ва БААга сафарлари чоғида унга ҳамроҳ бўлган яна бир шахсий қўриқчиси 2022 йилда учрашув жойига олиб борадиган йўлдан югурган.
Нашрнинг таъкидлашича, Strava маълумотлари 2023 йил сентябрь ойида КХДР раҳбари Ким Чен Ин билан учрашувда Путиннинг жойлашувини олдиндан аниқлаш имконини берган. Сафардан бир неча кун олдин Путин қўриқчиси Благовешченскда югуриш учун йўналиш белгилаган. Ушбу шаҳар яқинидаги “Шарқий” космодромда кейинчалик Путиннинг КХДР раҳбари билан учрашуви бўлиб ўтган.
Бу Le Monde журналистлари томонидан StravaLeaks деб номланган терговининг якуний, учинчи қисми ҳисобланади. Дастлабки икки қисмга кўра, АҚШ президенти Жо Байден, собиқ президент Дональд Трамп ва Франция раҳбари Эммануэль Макроннинг қўриқчилари ҳам иловада ўзларининг спорт ютуқларини улашган. Бу маълумотлар сиёсатчиларнинг ҳаракатланишларини кузатиш имконини ҳам берган.
Изоҳ (0)