AQSH prezidentligiga Respublikachilar partiyasidan nomzod Donald Tramp Demokratik partiyadan nomzod Kamala Harris saylovda g‘alaba qozonsa, Rossiya yoki Xitoy bilan muzokara olib bora olmasligini aytdi. Uning so‘zlariga ko‘ra, Harris buning uchun yetarli salohiyatga ega emas.
“Kamala Harris Rossiya yoki Xitoy bilan yadro urushi haqida gaplashishiga ishonasizmi? Yo‘q, albatta! Bizni iqtisodiy inqirozdan olib chiqishga ishonasizmi? Yo‘q! IQ darajasi nihoyatda past bo‘lgan, juda zaif va qobiliyatsiz odamga ulkan vakolat berishdan ko‘ra xavfliroq narsa yo‘q”, dedi Tramp Viskonsin shtatidagi saylovchilar oldida qilgan nutqida.
Bundan avval Donald Tramp Ukrainadagi jangovar harakatlarni to‘xtatish bo‘yicha muzokaralar olib borishga qodir ekanini bir necha bor ta’kidlagan. Sentyabr oyida u Vladimir Putin va Vladimir Zelenskiyni yaxshi bilishini va ularni “kelishtirishi” mumkinligini aytgandi.
5-noyabr kuni AQSHda prezidentlik saylovlari bo‘lib o‘tadi. Donald Tramp Respublikachilar partiyasidan, Kamala Harris esa Demokratik partiyadan nomzod sifatida ro‘yxatga olingan. Turli idoralar va ommaviy axborot vositalarining saylovoldi so‘rovlari nomzodlar uchun berilgan ovozlar soni bo‘yicha minimal farqlarni ko‘rsatmoqda. 24-oktyabr kuni The Wall Street Journal o‘tkazgan so‘rovda Tramp 47 foiz, Harris esa 45 foiz ovoz olgan.
Izoh (0)