“Мен ёш эмасман, лекин президентлик вазифасини бажара оламан” — Байден

АҚШ президенти Жо Байден ноябрь ойидаги сайловлардаги тахминий рақиби Дональд Трамп билан баҳсда яхши натижа кўрсатмаганини тан олди, аммо президентлик пойгасидан чиқиш нияти йўқлигини очиқ айтди.

Очиғини айтаман: мен энди ёш эмаслигимни биламан, мен аввалгидек осон юрмайман, аввалгидек равон гапирмайман, баҳслаша олмайман, лекин қандай қилиб ҳақиқатни айтишни биламан, — деди Байден Шимолий Каролинадаги сайловолди митингида тарафдорлари билан суҳбатда.

81 ёшли демократнинг айтишича, у бу ишни уддалай олишига “бутун қалби билан ишонмаганида”, кейинги муддатга номзодини қўймаган бўларди.

Байден ва Трамп ўртасидаги баҳс 28 июнь куни бўлиб ўтди. Маълум бўлишича, Байденнинг нутқидан сўнг АҚШ Демократик партиясини ваҳима босган. Politico нашрининг ёзишича, баъзи демократлар аллақачон сайлов пойгасида Байденни алмаштиришни фаол муҳокама қилмоқда. АҚШ вице-президенти Камала Харрис Байден Трамп билан баҳсни энг яхши тарзда бошламаганини тан олган.

https://x.com/JoeBiden/status/1806746426904379543

Трамп билан мунозарада Америка етакчиси қайта-қайта дудуқланиб, хириллоқ овозда жуда сокин гапирган. Интернетда АҚШ президентининг оғзини бир оз очиб тургани акс этган видео пайдо бўлган. Америкалик таҳлилчилар буни Байден учун ҳақиқий фалокат деб аташган. YouTubeъдаги дебат трансляцияси остидаги изоҳларда фойдаланувчилар сиёсатчини шармандали деб атаган.