Ички органларнинг фаолияти эндокрин безларда ишлаб чиқариладиган гормонлар томонидан тартибга солинади. Эндокринолог шифокор гормонал дисфункцияни даволайди. Унга мурожаат қиладиган беморлар орасида етакчи ўринни ёши катталар ва ўсмирларда кўпроқ учрайдиган 2-тоифа қандли диабетга чалинганлар ва ортиқча вазнли инсонлар эгаллайди.
Бундан ташқари, кенг тарқалган эндокрин муаммолар орасида қалқонсимон безнинг патологиялари кўпдир. Бу касалликда қалқонсимон безда турли тугунлар ҳосил бўлиши, унинг функцияси бузилиши кузатилади. Эндокрин тизимининг фаолиятидаги ҳар қандай бузилишни эътиборсиз қолдириш мумкин эмас.
Тиббий текширув гормонлар учун қон таҳлили билан чекланмайди. Керак бўлганда ултратовуш, рентген, компьютер томографияси қилиш буюрилади. Агар сиз қуйида санаб ўтилган аломатлардан бирини ўзингизда сезсангиз, эндокринологга ташрифни кечиктирманг.
Белгилар: тез-тез кичик ҳожатга қатнаш, доимий чанқоқ ҳисси (айниқса кечаси), доимий очлик ҳисси ёки аксинча, иштаҳанинг йўқлиги, кўриш қобилиятининг пасайиши, терининг қуруқлашиши.
Тахминий касаллик: қандли диабет.
Дастлабки текширув: қондаги шакар миқдорини аниқлаш.
Белгилар: ўзгарувчан кайфият, терининг қуруқлашиши, сочлар тўкилиши, баъзида танада шишлар пайдо бўлиши, юрак ритмининг бузилиши, тўсатдан вазн ортиши ёки аксинча озиб кетиш.
Тахминий касаллик: қалқонсимон без дисфункцияси.
Дастлабки текширув: қалқонсимон без гормонлари учун қон таҳлили.
Белгилар: қон босимининг ошиши ёки тушиб кетиши, терининг бронзага ўхшаш тусга кириши.
Тахминий касаллик: буйрак усти безининг дисфункцияси.
Дастлабки текширув: гормонлар учун қон таҳлили, қорин бўшлиғини магнит-резонанс томография қилиш.
Белгилар: бош оғриғи, кўриш қобилиятининг бузилиши, аёлларда ҳайз даврининг бузилиши ва сут безларидан ажралмалар келиши, эркакларда эса сут безларининг катталашиши. Қисқа вақт ичида пойабзал ҳажмининг ошиши (катталарда), юз тузилишининг катталашиши.
Тахминий касаллик: гипофиз безининг дисфункцияси (бош мияда жойлашган эндокрин безнинг касаллиги).
Дастлабки текширув: қондаги пролактин гормони даражасини текшириш. Мияни рентген ёки магнит-резонанс томография қилиш.
Белгилар: сурункали чарчоқ.
Тахминий касаллик: эндокрин органларининг бузилиши, D витамини етишмовчилиги ва темир даражасининг пасайиши.
Дастлабки текширув: D витамини даражасини текшириш ва умумий қон таҳлили топшириш (бунда ферритин энг муҳим кўрсаткичдир).
Белгилар: юз ва танада ортиқча соч ўсиши, гирсутизм.
Тахминий касаллик: аёллар организмида эркакларга хос жинсий гормонлар ишлаб чиқаришнинг ортиши, буйрак усти безларининг бузилиши, буйрак усти ўсимтаси. Баъзида бу ҳолат андрогенлар ёки кортикостероидларни ўз ичига олган дори-дармонларни қабул қилиш туфайли юзага келади. Жиддий аломатлар орасида бепуштлик ва ҳайз даврининг бузилиши мавжуд.
Дастлабки текширув: гормонлар учун қон таҳлили, таҳлил натижаларига кўра кейинги ташхис. Одатда гормонал терапия буюрилади.
Белгилар: менопауза.
Тахминий касаллик: эстроген даражасининг пасайиши. Гипертония ва қон томир патологияларининг ривожланиш хавфи мавжуд.
Дастлабки текширув: сут безлари, жинсий аъзолар ва қалқонсимон безни текшириш. Гормонал терапияни буюришдан аввал оилавий анемнезни йиғиш.
Изоҳ (0)