Қошлар юзнинг кичик қисмида жойлашган бўлса-да, инсон чеҳрасининг эстетик кўринишида муҳим роль ўйнайди. Унинг атрофидаги тери ташқи ва ички таъсирларга ўта сезгир бўлади. Шу боис қошларнинг тўкилиши организмдаги жиддий ўзгаришлар белгисидир. Нима учун қошлар тўкила бошлайди? Бунинг давоси борми? Шу ҳақда батафсил мақолада ёритамиз.
Қош тўкилиши этиологияси турли хил бўлиб, юқумли, аутоиммун, генетик, эндокрин ва травматик ҳолатлардан келиб чиқиши мумкин. Унинг сабабини эрта аниқлаш ва тўғри ташхис қўйиш даволашда муҳимдир.
Тери касалликлари
Псориаз, экзема ёки себорея дерматити каби касалликлар қошлар тўкилишига олиб келмайди, аммо улардан ҳосил бўлган тошма, яраларни қашлаш натижасида тери тирналади ва қошлар тўкилиши юзага келади.
Инфексион касалликлар ва холлар
Бирор инфекцияни бошидан ўтказиш ҳам қошларнинг сийраклашишига олиб келиши мумкин. Ўткир инфекциялар соч фолликуласига таъсир қилади ва қон айланишининг бузилишига олиб келади. Пешона соҳасидаги туғма ёки яқинда пайдо бўлган хол ва ўсимта ҳам қошлар тўкилишига сабаб бўлади.
Аллергия
Қош бўяйдиган қалам ва турли косметика воситалари терида аллергия қўзғаши мумкин. Бундай ҳолатда мазкур косметика воситасидан фойдаланишни тўхтатиш ва аллергологга мурожаат этиш лозим.
Қалқонсимон без касалликлари
Қалқонсимон безнинг фаол ишлаши ёки аксинча сустлашиши ҳам қош тўкилишига олиб келади. Бунда эндокринолог шифокорга мурожаат қилиш лозим.
Алопеция ёки каллик
Алопеция сочларнинг доимий ўсадиган тери қисмидан патологик ёки вақтинча тўкилиши ҳисобланади. У умумий ёки ўчоқли бўлиши мумкин. Биринчи ҳолатда одамнинг бутун танасида, иккинчисида эса фақатгина бошида соч тўкилади. Мазкур касаллик жиддий тус олмасидан тери касалликлари шифокорига учраш талаб этилади.
Стресс
Қошларнинг тўкилиши узоқ вақт давом этган стресс, депрессиядан ҳам келиб чиқиши мумкин.
Дори воситалари
Ҳар қандай таблетка бирор аъзони даволаса, бошқа органга салбий таъсир қилади. Айниқса гормонал контрацептив воситалар, кимётерапия, эпилепсия, псориаз ва артрит каби касалликка қарши дорилар ҳам қош тўкилишига сабаб бўлади.
Изоҳ (0)