Қалқонсимон без кичик бўлишига қарамай жуда муҳим аъзодир. Организмдаги кўплаб муҳим тизимлар саломатлиги унинг тўғри ишлашига боғлиқ. Унинг фаолиятидаги озгина бузилиш ҳам энг муҳим аъзоларнинг ишига жиддий таъсир қилиши ва хавфли касалликларни қўзғатиши мумкин. Қалқонсимон без ҳолатини баҳолаш учун айниқса ушбу аломатларга эътибор беринг.
Вазннинг тушунарсиз тарзда ўзгариши
Метаболизмнинг тезлиги қалқонсимон без фаолиятига ҳам боғлиқ, шунинг учун унинг ишидаги энг кичик ўзгариш ҳам дарҳол сезилади. Қалқонсимон без ҳаддан ташқари фаол бўлса, тўсатдан ва сезиларли даражада озиш ёки ҳеч қандай ҳаракатсиз вазн йўқотиш мумкин. Агарда, аксинча, без гормонларни одатдагидан кўра камроқ қонга чиқарадиган бўлса, инсонда шиш ва семириш бошланади. Иккала ҳолатда ҳам шифокор билан маслаҳатлашинг, анализ топширинг ва қалқонсимон безнинг ультратовуш текширувини ўтказинг.
Уйқусираш ва чарчоқ ҳисси
Ишингиз жуда кўп, дам олганингизга кўп бўлди ва етарлича дам ололмаяпсизми? Доим уйқусираб юрасиз, энг оддий ва одатий кундалик юмушлардан ҳам чарчаб қоласиз. Ўзингизни айблашга шошилманг: эҳтимол, буларнинг барчаси қалқонсимон безнинг меъёрда ишламаётганидан дарак бераётгандир. Эндокринологларнинг айтишича: агарда сиз мунтазам чарчоқ ҳисси билан уйғонсангиз, шифокорга мурожаат қилинг. Самарали даво чораларидан сўнг яна ишчан бўласиз.
Терморегуляция билан боғлиқ муаммолар
Атрофдагиларнинг ҳаммаси иссиқдан нолиб турганда сиз адёлга ўраниб оляпсизми? Ёки, аксинча, февралда терлаб кетасизми? Бу қалқонсимон без фаолиятининг бузилганлигини кўрсатиши мумкин бўлган аломатларнинг бири бўлиб, асосан терморегуляция билан боғлиқдир.
Ҳайз даврининг бузилиши ва ҳомиладор бўла олмаслик
Аёлларнинг репродуктив саломатлиги эндокрин тизим билан бевосита боғлиқ бўлиб, ҳомиладор бўлиш, асосан, қалқонсимон безнинг яхши ишлашига боғлиқ. Ҳайз циклидаги ўзгаришлар, унинг оғир кечишида эндокринолог билан боғланиш ва қалқонсимон безни текшириш лозим. Гап шундаки, гипотериоз овуляция ва ҳайз даврини бошқарадиган гормонлар ишлаб чиқаришни блокировка қилиши мумкин.
Депрессия ва хавотирланиш
Қалқонсимон без гормони ошиб кетса, организмнинг умумий ритми кучаяди, асаб тизими стрессни бошдан кечиради ва асабийлашамиз, таъсирчан ва хавотирли кайфият кузатилади. Гормонлар етишмаса ҳам ҳақиқий депрессия аломатларини бошдан кечиришимиз мумкин. Агар ортиқча ташвишланиш ёки депрессияга тушиб қолсангиз, эҳтимол, психиатрга қўшимча равишда эндокринологга учраш лозим.
Тери ва соч муаммолари
Гипотериознинг яна икки муҳим белгиси соч тўкилиши ва терининг қуруқлашишидир. Айниқса, ёз мавсумида ушбу аломатга дуч келсангиз эҳтиёт бўлиш керак. Чунки метаболизмнинг секинлашуви билан терлаш ҳам камаяди, натижада тери камроқ намланади, қурийди ва, ҳатто, тезроқ сувсизланади. Шунинг учун крем ва лосьонлардан қанжатланмай — эндокринолог билан маслаҳатлашинг!
Изоҳ (0)