«Туманларда шароит ва мутахассислар малакаси етишмаслиги оқибатида, диабетнинг оғир асоратлари бўйича мурожаатлар ошган» – Шавкат Мирзиёев

Президент Шавкат Мирзиёев бошчилигида ўтказилаётган видеоселектор йиғилишида эндокрин касалликларини бирламчи бўғинда эрта аниқлаш муаммоларига тўхталиб ўтди. Бу ҳақда «Дарё» мухбири хабар қилмоқда.

Бунинг учун, лабораторияларни жиҳозлаш, зарур реактивлар билан таъминлаш ва нафақат эндокринолог, балки оилавий шифокорларни ҳам тайёрлаш катта самара бериши қайд этилди.

«Лекин, битта туманда камида 10–15 та лаборатория бўлгани билан, қонни таҳлил қилишга шароит ва мутахассислар малакаси етишмаслиги оқибатида, диабетнинг оғир асоратлари – кўз, буйрак ва тўпиқ касалликлари бўйича республика муассасаларига мурожаатлар 10 фоизга ошган», – дейди Президент.

Президент Уйчи тумани тиббиёт бирлашмасига қарашли 14 та лабораторияда жами 62 нафар, шундан марказий шифохона ва поликлиника ҳамда шошилинч тиббий ёрдам бўлими лабораториясида жами 40 нафар ходим ишлашини мисол қилиб келтирди. Ушбу ходимларнинг иш ҳақи учун йилига 2,2 миллиард сўм, лабораторияга реактивлар учун эса атиги 175 миллион сўм ажратилаётгани айтилди.

Туман шифохонасида диабети бор бемордан, бир суткалик стационар кузатиш давомида ўртача 8 маротаба қон таҳлили олиш зарур бўлсада, 15 та лаборатория ва 60 дан ортиқ ходими бўлган туман даражасида бунинг имкони йўқлиги танқид қилинди.

«Сабаби оддий, марказий шифохона ва марказий поликлиникада лабораторияларнинг иш вақти тушлик пайти – соат 14:00 да тугайди. Туну-кун ишлайдиган шошилинч тиббий ёрдам бўлими лабораторияси эса, бир ҳудудда бўла туриб, шифохонанинг бошқа бўлимларига хизмат кўрсатмайди», – дейди Мирзиёев.

Президент, шунингдек, туманларда ёд дефицити, қалқонсимон без касалликларини аниқлаш бўйича гормонал таҳлиллар йўлга қўйилмагани боис, аҳоли хусусий лабораторияларга боришга мажбур бўлаётганини билдирди.

«Оқибатда халқимиз соғлиқни сақлаш тизимидан мутлақо норози. Буларни вилоят, туман ва шаҳар ҳокимлари, соғлиқни сақлаш идоралари бошлиқлари билмайди-ми?», – деди давлат раҳбари.

Шу боис, эндокрин касалликларини барвақт аниқлаш, уларнинг олдини олиш ва даволаш бўйича алоҳида Дастур қабул қилиниши хабар қилиниши билдирилди.