Ёз фасли ҳам ўз ниҳоясига етиб бормоқда, сиз эса ҳали ҳам озишга улгурмадингизми? Ҳечқиси йўқ, танангиз ва соғлиғингиз ҳақида қайғуриш учун маълум вақтни кутиш шарт эмас. Спорт билан шуғулланишни йилнинг исталган вақтида бошлаш мумкин.
Агар биринчи мартаси озишни мақсад қилган бўлсангиз, ортиқча чарчатмайдиган, аммо самара берадиган озиш методларидан бошлашингиз мумкин. Масалан, эндокринолог Юлия Паутова ишни тоза ҳавода юришдан бошлашни маслаҳат беради. Аста-секин бу одат тусига киради ва қўшимча машқларни бажариш қийин бўлмайди.
“Спорт билан шуғулланишни одатий тезликда узоқ масофага юриш, бадантарбия ва нафас олиш машқларидан бошланг. Агар спорт залига боришни истасангиз, малакали тренерни топиш лозим, у сизга мос бўлган дастурни ишлаб чиқади”, дея тушунтирди шифокор.
Тоза ҳавода юришнинг яна бир фойдаси кислороддир. Мутахассиснинг фикрига кўра, тоза ҳаводаги машғулотлар бино ичидаги машқдан кўпроқ самара беради.
“Ҳатто офис ходими бўлсангиз ҳам бирор жисмоний ҳаракат қилиш учун имкон топишга урининг. Масалан, ишга бориш ва қайтишда 2 бекат аввалроқ йўлда тушиб қолинг ва қолган масофани пиёда босиб ўтинг, лифт ўрнига зинапоялардан фойдаланинг, компьютерда ишлаш вақтида ҳар соат 5 дақиқага танаффус қилинг, эрталаб ва кечқурун нафас олиш машқларини бажаринг.
Асосийси, ҳар қандай ҳаракатга устунлик беришдир. Кўп одамлар вазн ташлаш жараёни учун кислород қанчалик муҳим эканлигини билмайди. Шунинг учун озиш учун кўпроқ очиқ ҳавога чиқиш муҳимдир”, дейди мутахассис.
Уйқу режими ҳам қоматга таъсир қилади. Эндокринолог-диетологнинг айтишича, уйқуга кеч ётиш одати ортиқча вазннинг ортишига олиб келиши мумкин.
Тана вазнини нормаллаштириш инсоннинг сиркад ритмини тиклашдан бошланади. 2-4 соат давом этадиган ушбу цикл барча ички аъзолар фаолиятини бошқаради. Яъни, озиш учун қилинган машқлар эрта уйқуга ётиш одатини шакллантириш орқали яхшироқ самара беради.
“Ортиқча вазндан халос бўлиш истагидаги беморларга соат 23:00 дан аввал ухлаш тавсия қилинади. Идеал ҳолда соат 10 да уйқуга кетиш зарур. Чунки соат 21 дан 23 гача мелатонин гормони ишлаб чиқарилади. У кўплаб метаболик жараёнлар учун жавобгар бўлиб, “ёшлик гормони” деб ҳам аталади. Барвақт уйқу айниқса қорин соҳасидаги ёғлардан халос бўлишга кўмак беради”, дейди Юлия Паутова.
Изоҳ (0)