Норвегия мудофаа вазири Бьорн Арилд Грам F-16 қирувчи самолётларининг жанговар қобилиятини сақлаб қолиш учун Киевга 118 миллион доллар ажратилишини маълум қилди.
“Вазир 29—30 октябрь кунлари Украинанинг порт шаҳри Одессага ташриф буюрди. У Украина ҳарбий-ҳаво кучларига қўшимча 118,4 миллион доллар ажратиш орқали қўллаб-қувватлашни оширишини айтди. Мазкур маблағ F-16 қирувчи самолётлари учун ўқ-дорилар ва эҳтиёт қисмлар сотиб олишга сарфланади”, дейилади баёнотда.
Хабарда айтилишича, Осло 2024—2025 йилларда Украинага олтита F-16 самолётларини етказиб бермоқчи. Шунингдек, украиналик учувчиларни Данияда ўқитишга ёрдам бериш режалаштирилган.
Бундан ташқари, вазир Норвегия Украинага 130 дона пуфлама қайиқларни топширишини, биринчи етказиб бериш аллақачон амалга оширилганини таъкидлади.
Сентябрь ойида Норвегия ҳукумати Украинага йиллик ёрдам кўрсатиш муддатини 2030 йилгача узайтирди ва бу мақсадлар учун ҳар йили қўшимча 475 миллион доллар ажратишини маълум қилди.
Норвегиянинг Киевга 2030 йилгача бўлган умумий ёрдами кутилган 7,1 миллиард доллардан 12,8 миллиард долларгача ошди.
Изоҳ (0)