АҚШ расмийлари Европада украиналик учувчиларни Американинг Lockheed Маrtin ҳарбий-саноат корпорацияси томонидан ишлаб чиқарилган F-16 қирувчи самолётлари билан ўқитишга рухсат бермаяпти. Бу ҳақда The New York Times нашрига анонимлик шарти билан Украинанинг юқори мартабали мулозимларидан бири маълум қилди.
16 май куни Буюк Британия ва Нидерландия ҳукумат раҳбарлари Киев ҳарбий ёрдам сифатида сўраган замонавий қирувчи самолётларни харид қилиш бўйича халқаро коалиция тузилганини эълон қилди. F-16 самолётларини етказиб бериш фақат АҚШ рухсати билан амалга оширилиши мумкин. Бу ҳолат машғулотларга ҳам тааллуқли: Европадаги ҳамкорлар украиналик учувчиларни фақат техник тил билан таништиришлари ва тактика дарсларини ўтказишлари мумкин, самолётларда синов парвозларини ўтказиш учун уларга рухсат берилмаган.
Жо Байден маъмурияти расмийсининг NYT’га айтишича, Вашингтон ҳали ҳам Киевга ўз қирувчиларини жўнатиш ниятида эмас, чунки бу жуда қиммат ва вақт талаб этади. Қўшма Штатлар асосий эътиборни бошқа қурол-яроғларни етказиб беришга қаратмоқчи, бироқ амалдор охир-оқибат Европадаги иттифоқчиларга F-16 самолётларини Украинага реекспорт қилиш учун лицензия берилишини истисно этмаяпти.
Нидерландия, Дания ва Бельгия Киев билан ўз қирувчиларини баҳам кўриш истагини аллақачон билдирган. Мутахассисларнинг фикрича, бу давлатлар камида 125 та тайёр Ф-16 самолётларини етказиб бера олади. Норвегия ҳам ўзининг фойдаланишдан чиқарилган Америка қирувчиларини топширишга тайёр.
Украина ҳукумати Россия билан ҳавода тўқнашиш учун 180 га яқин замонавий қирувчи кераклигини таъкидлаган, аммо ҳозирда Киев 24—36 та самолёт сўрамоқда.
Изоҳ (0)