2017 йил 16 январда Қирғизистон пойтахти Бишкекдаги «Манас» аэропортидан 2 километр нарида жойлашган қишлоқ устига ACT Airlines компаниясига қарашли Boeing 747-400 юк самолёти қулади. Охирги маълумотларга қараганда, ушбу фожиа оқибатида 35 киши, шу жумладан, тўрт нафар экипаж аъзоси ҳалок бўлди, қишлоқда жойлашган дала ҳовлиларнинг ярми вайрон бўлди. Мамлакатда мотам эълон қилинди.
Ушбу воқеа муносабати билан Қирғизистоннинг «АКИpress» агентлиги мамлакатда 2000 йилдан буён рўй берган энг йирик авиаҳалокатларни ёдга олди.
2015 йил 22 ноябрида Ўш шаҳри аэропортида Boeing-737 қаттиқ қўниши оқибатида шасси ва қаноти синиб кетди. Қўниш об-ҳаво ёмон бир пайтда тунда амалга оширилаётгани боис ҳалокат содир бўлди. Бир неча соат муқаддам самолёт Ўшда қўна олмай, Бишкекка йўл олган, сўнг яна Ўшга қайтган эди. Шасси бузилиши оқибатида борт қўниш тасмасидан чиқиб кетди. Шунингдек, ҳаво кемаси фюзеляжидан 1,5 метр наридан қаноти узилиб кетди.
Бортда бўлган 159 киши омон қолди.
2014 йил 18 июлида Хонтангри тоғи ёнбағрида Ми-8 вертолёти ҳалокатга учради. Қирғизистон мудофаа вазирлигига тегишли аппарат россиялик альпинистни эвакуация қилиш чоғида қулади. Воқеа денгиз сатҳидан 5200 метр баландликда рўй берди.
Ҳеч ким жабр кўрмади.
2013 йил 24 майида Жалолобод вилоятининг Ақси туманида Ан-2 электр узатиш линиясига тегиб кетиши оқибатида уч киши ҳалок бўлди.
Ўша куни Valor Air авиакомпаниясига тегишли самолёт Ақси туманида кимёвий ишларни амалга ошираётган эди. Тоғ ёнбағрига кимёвий ишлов бериш чоғида 15 метр баландликда самолёт электр узатиш линияларига тегиб кетиб, қулади ва ўт олди.
Бортда бўлган икки экипаж аъзоси ва йўловчи ҳалок бўлди.
2013 йил 3 майида АҚШ ҳарбий-ҳаво кучларининг ёқилғи қуювчи самолёти — KC-135 Stratotanker ҳалокатга учради. «Манас» аэропортидан учиб чиққан борт жанубга қайрилаётганида тезликни ва баландликни йўқота бошлади, бунинг натижасида ҳавода портлаш рўй берди. Самолёт учта йирик бўлакка ажралиб кетди. Экипажнинг уч нафар аъзоси ҳалок бўлди.
2011 йил 28 декабрида Ўш аэропортида Ту-134 самолёти қўниш чоғида ҳалокатга учради.
Об-ҳаво ва кўриш шароитлари ёмон эди. Қаттиқ қўниш пайтида шасси билан бирга самолётнинг ўнг қаноти узилиб тушди, аппарат қўниш тасмасидан чиқиб кетиб, ағдарилди, сўнг ўт олди. 82 йўловчи (69 ёши катта киши, тўрт бола ва тўққиз кўкракдан чиқмаган гўдак) ҳамда олти нафар экипаж аъзоси самолётни тарк этиб, тирик қолди. 26 кишига тиббий ёрдам керак бўлди.
Самолёт бутунлай ёниб кетди.
2008 йил 24 августида «Манас» аэропорти яқинидаги Жангажер қишлоғида «Итек-Эйр» авиакомпаниясининг Бишкек-Теҳрон рейсини амалга ошираётган Boeing-737-200 самолёти аэропортга 9 километр қолганда қулади. 65 киши ҳалок бўлди, 25 киши тирик қолди.
2007 йил 23 июнида Норин вилоятида Як-40 самолёти ерга қўнишга мажбур бўлди.
Мамлакат авиакорхоналари раҳбарларини олиб кетаётган самолётнинг икки двигатели парвоз чоғи ишдан чиқди, шу боис учувчилар уни Қорақужур дарасида қўндиришга мажбур бўлди. Аммо шасси чиқмай қолгани боис самолёт ўт олди. Тўққиз нафар олий мартабали йўловчи ва беш нафар экипаж аъзоси самолётни тарк этишга улгурди.
2006 йил 26 сентябрида «Манас» аэропортида Ту-154 самолёти АҚШ ҲҲКнинг KC-135 самолёти билан тўқнашиб кетди. Ту-154 қанотининг бир қисми узилиб тушди.
Икки ҳаво кемаси экипажи аъзолари ва 52 нафар йўловчи омон қолди.
2005 йил 6 августида ФВВга қарашли Ми-8 вертолёти Иссиқкўл вилоятида «Жанубий Энильчек» альпинистлар лагеридан кўтарилишда ҳалокатга учради.
Вертолёт туристларни олиб кетиши керак эди. 17 турист ва тўрт нафар экипаж аъзоси бортни тарк этишга улгурди. Вертолёт бутунлай ёниб кетди.
2004 йил 4 ноябрида Нидерландия ҲҲКнинг F-16 Falcon қирувчиси «Манас» аэропортида фавқулодда қўнишга мажбур бўлди.
Қўнишдан сўнг самолётнинг шасси гидравликаси ишдан чиқди, шундан сўнг у тасмадан чиқиб кетди. Учувчига зиён етмади.
2004 йил 15 мартида Отбоши туманида қор кўчкисида қолиб кетган овчилар гуруҳини эвакуация қилиш учун юборилган ФВВнинг Ми-8 вертолёти ҳалокатга учради. Бортга 20 киши, шу жумладан, уч нафар АҚШ ва Канада фуқаросини олган вертолёт ҳавода ўзини ушлаб туролмай қулади. Икки киши ҳалок бўлди.
Вертолёт ёниб кетди.
2002 йил 17 декабрида «Манас» аэропортида Норвегия ҲҲКнинг F-16 Falcon қирувчиси фавқулодда қўнишни амалга оширди.
Самолёт қаттиқ кўнгани боис орқа шасси узилиб тушди, ва у қорнида бир неча ўн метр юрди. Учувчига зиён етмади.
2002 йил 23 октябрида «Манас» аэропортида Ил-62 юк самолёти ҳалокатга учради.
Москва–Бишкек рейсини амалга ошираётган, «Третьяково» авиакомпаниясига тегишли борт учиш-қўниш тасмасидан чиқиб кетиб, тўсиққа урилди ва ўт олди. Бортда бўлган саккиз нафар экипаж аъзоси чиқиб олишга улгурди.
Самолёт бутунлай ёниб кетди.
2000 йил15 мартида Норин вилоятининг Отбоши туманида Ми-8 вертолёти қояга урилиб қулади.
Вертолёт бир гуруҳ овчиларни олиб кетишга келган эди. Аммо об-ҳаво ёмонлиги туфайли вертолёт думи қояга тегиб кетди. Уч киши, шу жумладан, парламент депутати Эркинбек Матиев ҳалок бўлди, тўрт киши жароҳат олди.
Вертолёт бутунлай ёниб кетди.
Изоҳ (0)