Украинанинг Ғарбдан олган ҳарбий ёрдами 100 млрд долларга етди

Россия босқини бошланганидан бери Украина Ғарбдаги ҳамкорларидан 100 миллиард долларлик ҳарбий ёрдам олди. Бу ҳақда Украина мудофаа вазири лавозимидан истеъфога чиқаётган Алексий Резников “Ukrinform” агентлигига берган интервьюсида маълум қилди.

Унинг сўзларига кўра, ушбу суммага нафақат ҳарбий техника, балки қурол-яроғ, ўқ-дорилар ва снарядлар ҳам киради. Барча ёрдамнинг ярмидан кўпи — деярли 60 миллиард долларни Украина АҚШдан олган.

Резниковнинг таъкидлашича, ҳозирда Киев учун ҳаво мудофааси устувор вазифа бўлиб қолмоқда.

“Бу Patriot, NASAMS, Gepart га ўхшаш SAМP/Т, Ирис-Т, Crotale каби янги замонавий тизим комплекслари; Stinger, Starstreak каби қўлда бошқариладиган зенит-ракета комплекслари; Булар турли хил гранаталар, танкка қарши тизимлар ва бошқалар”, — дея санади Резников.

“Ва, албатта — авиация, чунки авиация ҳаво мудофаасининг бир қисмидир, авиация платформаси ҳаво нишонларини — қанотли баллистик ракеталардан тортиб уларни ташлайдиган самолётлар, шу жумладан, дронлар, Shahed лар ва бошқаларни уриш имконини беради. Бугун биз F-16 қирувчи самолётларини олишимиз ҳам аниқ бўлиб турибди”.

Вазирнинг сўзларига кўра, Американинг F-16 қирувчилари Украинага 2024 йил баҳорида етказилади.

“Мен уларни ишлатиш аллақачон бошланганини кўряпман. Чунки бугунги кунда машғулотлар учун рухсатнома бор, ўқитишга рози бўлган давлатлар ҳам бор, ҳаттоки, машғулотлар якунланиб, инфратузилма тайёрлангач, F-16 самолётларини бизга беришга рози бўлган давлатлар ҳам бор”, — дея қўшимча қилди у.

Аввал Нидерландия, Дания ва Норвегия украиналик учувчилар ўқув машғулотларини тугатгандан сўнг F-16 қирувчи самолётларини Киевга топшириши ҳақида маълум қилганди.