Украина ҳарбий учувчилари октябрь ойида Аризонадаги Моррис авиабазасида АҚШнинг F-16 қирувчи самолётларида учиш дастури бўйича машғулотларни бошлайди. Бу ҳақда Пентагон матбуот котиби, бригада генерали Патрик Райдер маълум қилди.
“Сентябрь ойида учувчиларга инглиз тили ўқитилганидан сўнг, октябрь ойида Аризона штатининг Туксон шаҳридаги Моррис ҳаво миллий гвардия базасида 162-миллий ҳаво гвардияси қаноти кўмагида F-16 учувчиларини тайёрлаш бошланади”, — деди Райдер матбуот брифингида.
АҚШ Мудофаа вазирлиги матбуот котиби мамлакатга келадиган учувчилар сонини ошкор қилмади, бироқ гуруҳ таркибида “бир нечта учувчилар ва ўнлаб хизматчилар” бўлишини айтиб ўтди.
Август бошида Тhе Washington Post украиналик учувчилар учун олти ойлик тренинг 2024 йилнинг январига қадар бошланмаслигини, чунки улар аввал Буюк Британияда тўрт ойлик инглиз тили курсларини ўташи зарурлигини ёзганди. 24 август куни манбаларнинг CNN телеканалига айтишича, украиналик учувчилар инглиз тили курсларини АҚШда ўқийди, шундан сўнг улар F-16 самолётлари билан машғулотларни бошлайди.
Март ойида икки украиналик учувчи Дэвис-Монтхан ҳаво кучлари базасига олиб келинганди, мақсад — улар F-16 да учишни қанчалик тез ўрганиши мумкинлигини кўриш бўлган. Синовда украиналик учувчилар бир нечта соҳаларда ўртачадан юқори қобилиятни намойиш этган.
Шу ҳафта бошида Нидерландия ва Дания Украинага F-16 қирувчи самолётларини украиналик учувчилар машғулотларни тугатгандан сўнг топширишини маълум қилди. Нидерландия 42 та, Дания 19 та қирувчини топширади. Дания Мудофаа вазирлиги учувчилар август ойи охирида машғулотларга киришишини айтди. Норвегия ҳам самолётларни ваъда қилган, аммо қанча ва қачон топшириши номаълум.
Июль ойида АҚШ Миллий хавфсизлик кенгашининг стратегик алоқалар бўйича координатори Жон Кирби Украина Қуролли кучлари 2023 йил охиригача F-16 қирувчи самолётларини олишини айтганди.
Изоҳ (0)