АҚШ президенти Жо Байден украиналик учувчиларни Европа мамлакатларида F-16 қирувчи самолётларини бошқаришга ўқитишни маъқуллади. Бу ҳақда Америка етакчисининг миллий хавфсизлик бўйича маслаҳатчиси Жейк Салливан CNN телеканалига маълум қилди.
“Президент яшил чироқ ёқди. Биз украиналикларга европаликлар тайёр бўлиши биланоқ F-16 да машғулотларни бошлаши учун рухсат берамиз, қўллаб-қувватлаймиз, ёрдам берамиз ва зарур воситалар билан таъминлаймиз”, — деди Салливан.
Европа давлатларининг бунга ҳозирлик кўриши учун бир неча ҳафта вақт керак, деб қўшимча қилди маслаҳатчи.
Вильнюсдаги саммитда НАТО давлатлари украиналик учувчиларни тайёрлаш бўйича коалиция тузилганини эълон қилганди, унинг таркибига Дания, Нидерландия, Бельгия, Канада, Люксембург, Норвегия, Польша, Португалия, Руминия, Швеция ва Буюк Британия киради.
15 июль куни Politico нашри 11 давлатдан иборат коалиция машғулотларини бошлаш учун АҚШдан тасдиқ кутаётгани, Вашингтон расман рухсат бермагунча ишга киришолмаслигини хабар қилди.
Нашрнинг ёзишича, коалиция машғулотларни август ойида бошлашни кутмоқда, ўшанда Руминиядаги ўқув маркази ўз ишини бошлаши керак. Бироқ машғулотларнинг аниқ бошланиш санаси АҚШ Давлат департаменти томонидан белгиланади.
Май ойида Буюк Британия ва Нидерландия Украина ҳаво мудофаасини кучайтириш ва украиналик учувчиларни Ғарб самолётларида ўқитиш бўйича коалиция тузишни таклиф қилганди. Кейинчалик АҚШ Европа давлатлари томонидан Киевга қирувчилар берилишига қарши эмаслиги маълум бўлди. Бироқ бу ҳақда расман эълон қилинмаган.
Изоҳ (0)