Financial Times газетасининг Hurun тадқиқот институти маълумотларига таяниб хабар беришича, сўнгги уч йил ичида Хитойда долларли миллиардерлар сони учдан бир қисмидан кўпроққа камайди.
Қайд этилишича, мамлакатда миллиардерларнинг максимал сони 2021 йилда 1185 нафарни ташкил этган. Шундан сўнг уларнинг сони аста-секин камайиб, охирги ҳисобда 753 нафар қолган, бу 2021 йилга нисбатан 36 фоизга кам.
Мутахассисларга кўра, миллиардерлар сонининг қисқаришини фақат юаннинг долларга нисбатан қадрсизланиши билан изоҳлаб бўлмайди. Хитойда долларли миллиардерлар сони сўнгги бир йил ичида 16 фоизга камайган, юан эса долларга нисбатан атиги 2,5 фоизга қадрсизланган. Охирги уч йил ичида Хитой валютаси 10 фоизга тушиб кетган.
Hurun таъкидлаганидек, миллиардерлар сонининг кескин камайиши COVID-19 пандемиясининг салбий оқибатлари билан боғлиқ. Сабаб сифатида фонд бозорларидаги пессимистик кайфият, ҳокимият томонидан тазйиқ ва чекловлар ҳам келтирилмоқда.
Hurun’га кўра, Хитойдаги энг бой одам ByteDance раҳбари Чжан Имин ҳисобланади. Унинг бойлиги 49,3 миллиард долларга баҳоланган.
Изоҳ (0)