Хитой жанубидаги Гуйчжоу провинцияси суди 17 нафар болани ўғирлаб сотган аёлни ўлим жазосига ҳукм қилди, дейилади Хитой Олий халқ прокуратураси сайтида эълон қилинган баёнотда.
“Гуйян шаҳар оралиқ халқ суди (Гуйчжоу провинцияси маъмурий маркази) Йу Хуайингни болаларни ўғирлаш ва сотишда айбдор деб топди. У барча сиёсий ҳуқуқлардан маҳрум қилинган ҳолда, шахсий мулки мусодара этилди ва ўлимга ҳукм қилинди”, дейилади хабарда.
Sinjinbao газетасининг ёзишича, Йу Хуайинг судда жабрланувчиларга лоқайд бўлган ва қилмишидан пушаймонлигини билдирмаган.
Нашрнинг қайд этишича, 2023 йил сентябрида Гуиянг суди Йу Хуайингни ўлимга ҳукм қилган, бироқ жиноятнинг янги қурбонлари аниқлангач, иш қайта кўриб чиқиш учун юборилган. Суд айбланувчи аввал маълум қилинганидек 11 эмас, 17 нафар болани ўғирлаганини аниқлади.
Нашрнинг ёзишича, Йу Хуайинг сотган биринчи одам ўз фарзанди бўлган. 2004 йилда у болаларни ўғирлаш ва сотиш учун ҳибсга олинган эди, аммо ўшанда далилларнинг етишмагани сабабли у атиги 8 йилга озодликдан маҳрум қилинган. Озодликка чиққанидан кейин Йу Хуайинг жиноий фаолиятини давом эттирди.
Изоҳ (0)