Хитойнинг Бозорни назорат қилиш ва тартибга солиш давлат бош бошқармаси Alibaba компаниясини монополияга қарши қонунни бузгани учун 18,34 миллиард юань (2,78 миллиард доллар) миқдорида жаримага тортди.
2020 йилнинг охирида бошқарма Alibaba компаниясида монополияга қарши текширув бошлаган эди. Ўз ўрнида компания олиб борилаётган текширувларда ҳукумат билан фаол ҳамкорлик қилишини ва компаниянинг фаолияти тўхтатилмаслигини маълум қилган.
«Монополияга қарши кураш тўғрисидаги қонуннинг 47 ва 48-моддаларига мувофиқ ва Alibaba Group’нинг ноқонуний фаолияти, унинг давомийлиги ва ҳажмини ҳисобга олган ҳолда, 2021 йилнинг 10 апрель куни Хитойнинг Бозорни назорат қилиш ва тартибга солиш давлат бош бошқармаси компанияни 2019 йил ички савдолардан тушган жами 455,712 миллиард юаннинг 4 фоизи (жами 18,228 миллиард юань) миқдорида жаримага тортишга қарор қилди», — дейилади бошқарма сайтидаги хабарда.
Маълумот учун, аввал Qualcomm компанияси соф рақобат қоидаларини бузгани учун 975 миллион доллар миқдорида Хитой тарихидаги энг йирик жаримани тўлаган эди.
Аввалроқ Хитой монополияга қарши кураш органлари ҳукумат билан зиддиятга борган 56 ёшли миллиардер Жек Мага тегишли Alibaba интернет савдо тармоғига рекорд даражада жарима солишни режалаштираётгани маълум бўлди.
Шунингдек, Шанхайдаги чиқишидан сўнг, Хитой ҳукумати билан юзага келган келишмовчиликдан кейин, Жек Ма муайян вақт омма олдида кўриниш бермаган. У Хитойни тарк этган ёки ҳибсга олинган, деган тахминлар пайдо бўлган, аммо унинг дўстлари тадбиркор мамлакатда эканини даъво қилган. 2021 йил январь ойида Жек Ма уч ой ичида биринчи марта жамоатчилик олдида пайдо бўлди.
Изоҳ (0)