Хитойлик миллиардер Жек Ма 2015 йилда асос солинган Hupan бизнес мактабининг президентлигидан кетади. Бу ҳақда Financial Times хабар берди. Нашрнинг маълумотларига кўра, Ма мактабда маъруза ўқишни давом эттиради.
Ўтган ҳафтада ОАВга берилган маълумотларга кўра, Hupan University ўз номини Hupan Innovation Center’га ўзгартирди. Манбалар берган маълумотларга кўра, сўнгги йилларда қайси ўқув юртлари университет мақомига эга бўлиши мумкинлиги устидан қатъий назорат ўрнатган Хитой ҳукуматининг босими остида бизнес мактаби ўз номидан «университет» сўзини олиб ташлашга мажбур бўлди.
Апрель ойида Financial Times’нинг ёзишича, Жек Манинг бизнес мактаби ўқув машғулотлари март ойининг охирида бошланиши белгиланган биринчи курс талабаларини қабул қилишни тўхтатишга мажбур бўлган ва ўқув жараёнлари бошланмаган.
Hupan University билан бўлган воқеа Хитой ҳукуматининг Жек Мага қилаётган босимининг яна бир далили ҳисобланади. 2020 йилда Alibaba’нинг Ant Group бўлимига тегишли IPO’лар (initial public offering — акцияларнинг бошланғич оммавий таклифи) бекор қилинди, кейинроқ Alibaba устидан монополияга қарши текшириш бошланди ва Хитой ҳукуматининг Alibaba’дан компаниянинг медиа-активларини ажратишни талаб қилгани маълум бўлди.
Хитой ҳукумати ва шахсан давлат раҳбари Си Цзиньпиннинг молиявий тартибга солувчиларнинг «инновацияларини бўғиб қўйиши», шунингдек, Alibaba раҳбарининг бутунлай мустақил позицияси ва кучайиб бораётган таъсири масаласидаги норозиликлари Жек Манинг фаолиятида тўсиқлар ҳосил қилмоқда.
Маълумот учун, Хитойнинг Бозорни назорат қилиш ва тартибга солиш давлат бош бошқармаси Alibaba компаниясини монополияга қарши қонунни бузгани учун 18,34 миллиард юань (2,78 миллиард доллар) миқдорида жаримага тортди.
Шунингдек, Хитой монополияга қарши кураш органлари ҳукумат билан зиддиятга борган 56 ёшли миллиардер Жек Мага тегишли Alibaba интернет савдо тармоғига рекорд даражада жарима солишни режалаштираётгани маълум бўлди.
Изоҳ (0)