25 декабрь куни Хитойда «Game of Thrones: Winter Is Coming» стратегияси орқали машҳурликка эришган ўйин ишлаб чиқарувчи Yoozoo Group компанияси асосчиси ва раҳбари миллиардер Линь Ци вафот этди, деб ёзади Meduza. У 39 ёшда эди. Yoozoo директорлар кенгаши 26 декабрь куни унинг ўлими ҳақида баёнот эълон қилди, аммо бунинг сабабини келтирмади.
Сал кейинроқ Шанхай полицияси Линь Ци заҳарланганини маълум қилди. Бизнесменнинг ўлимига алоқадорликда гумонланиб, унинг Сюй фамилияли 39 ёшли ҳамкасби қўлга олинди. Полициячилар маълум қилишича, 17 декабрь куни эҳтимолий заҳарланиш белгилари билан Линь Ци ётқизилган касалхонадан уларга хабар берилган. Текширув чоғида полиция жиноятни катта эҳтимол билан бизнесменнинг ҳамкасби содир этган деган хулосага келган.
Полиция қўлга олинган одам ҳақида бошқа тафсилотларни келтирмади. Иш доирасида Yoozoo компаниясининг кино ишлаб чиқариш бўлими раҳбари Сюй Яо қўлга олинган бўлиши мумкин, дея хабар қилади Пекиннинг Caixin нашри ўйин саноатидаги аноним манбаларига таяниб. Уларнинг сўзларига кўра, Сюй Яо Yoozoo’да «Уч жисм муаммоси» сериали — хитойлик фантаст-ёзувчи Лю Цисиннинг шу номли романи адаптацияси устида ишлаган, асар инглиз тилига таржима қилинганидан кейин кенг жамоатчилик эътирофига тушган. Ушбу сериал Netflix стриминг сервисига чиқарилиши режалаштирилган эди.
Заҳарланишдан аввал компания раҳбари ва унинг қўл остидаги ходим ўртасида низо чиққан бўлиши мумкин, деб ёзади The Hollywood Reporter Хитой нашрларига таяниб. Уларнинг тахминларига кўра, Линь Ци бир пиёла пуэр чойи ёрдамида заҳарланган. Аммо Variety қайд этишича, ҳозир бу версия асосий бўлмай қолган. ХХР Коммунистик партиясига алоқадор Хитой ОАВларида Сюй компания раҳбарини «ишга алоқадор келишмовчиликлар» сабабли заҳарлагани, бунинг учун доридан фойдалангани ҳақидаги версия айтилмоқда. Бошқа манбалар Линь Ци бир неча хил заҳарлар аралашмаси билан заҳарланганини тахмин қилмоқда.
Линь Ци Yoozoo’га 2009 йилда асос солган. Компания аввало видеўйинлар чиқарувчи студия сифатида машҳур. «Тахтлар ўйини» сериали асосида яратилган «Game of Thrones: Winter Is Coming»’дан ташқари, унинг портфелига, хусусан, «League of Angels» ва «Drakensang Online» онлайн роль ўйнаш ўйинлари киради. Бундан ташқари, Хитойнинг Tencent холдинги билан бирга яратилган «Brawl Stars» мобил ўйини ишлаб чиқарувчиларидан бирига айланди.
2014 йилда Yoozoo компанияси фильм яратиш билан шуғуллана бошлади. Бир йилдан кейин у «Уч жисм муаммоси» романини экранлаштириш ҳуқуқини қўлга киритди. Дастлаб компания китобни мустақил экранлаштирмоқчи эди, аммо 2020 йил сентябрда Netflix билан шу китоб асосида сериал чиқаришга келишиб олди. Линь Ци «Тахтлар ўйини» сериали шоуранерлари Дэвид Бениофф ва Ден Вайс билан бир қаторда, лойиҳанинг продюсерларидан бирига айланди.
Линь Ци Hurun Report талқини бўйича Хитойнинг энг бой тадбиркорлари рўйхатида 870-ўринни эгаллаган эди. Унинг бойлиги 6,8 миллиард юань (бир миллиард доллар)га баҳоланган.
Изоҳ (0)