Alibaba’нинг шўъбаси Ant Group компания асосчи Жек Манинг улушини сотиш ва хитойлик тартибга солувчилар босими доирасида унинг бошқарувдан чиқарилиши имкониятларини кўриб чиқмоқда. Бу ҳақда Reuters хабар берди.
ОАВ маълумотларига кўра, Марказий банк, Хитой халқ банки, Банк ишини тартибга солиш ва суғурталаш комиссиясининг (CBIRC) мансабдор шахслари январь ойидан март ойигача Ant Group вакиллари ва Жек Ма билан алоҳида музокаралар олиб борган. Учрашувларда тадбиркорнинг компаниядан чиқиш имконияти муҳокама қилинган.
Компания миллиардлаб долларга баҳоланган Манинг улушини ташқи ташкилотларни жалб қилмасдан, Ant Group ёки Alibaba Group Holding инвесторларининг ўзига сотишни режалаштирган эди. Лекин назоратчилар акцияларнинг Жек Мага боғлиқ ҳар қандай шахсга сотилишига йўл қўймаслигига ишора қилди, энди компания асосчиси бизнесдан бутунлай чиқиб кетиши керак бўлади.
Манбаларнинг аниқлик киритишича, ҳар қандай чора-тадбирлар Пекин томонидан маъқулланиши керак.
Ҳозир Жек Ма Ant Group’нинг тўғридан-тўғри 10 фоиз акцияларининг эгаси ҳисобланади. Унинг Hangzhou Yunbo инвестиция компанияси Ant Group’нинг жами 50,5 фоиз акцияларига эгалик қилувчи бошқа иккита ташкилотни назорат қилади.
Маълумот учун, Хитойнинг Бозорни назорат қилиш ва тартибга солиш давлат бош бошқармаси Alibaba компаниясини монополияга қарши қонунни бузгани учун 18,34 миллиард юань (2,78 миллиард доллар) миқдорида жаримага тортди.
2020 йилнинг охирида бошқарма Alibaba компаниясида монополияга қарши текширув бошлаган эди. Ўз ўрнида компания олиб борилаётган текширувларда ҳукумат билан фаол ҳамкорлик қилишини ва компаниянинг фаолияти тўхтатилмаслигини маълум қилган.
Аввалроқ Хитой монополияга қарши кураш органлари ҳукумат билан зиддиятга борган 56 ёшли миллиардер Жек Мага тегишли Alibaba интернет савдо тармоғига рекорд даражада жарима солишни режалаштираётгани маълум бўлди.
Шунингдек, Шанхайдаги чиқишидан сўнг Хитой ҳукумати билан юзага келган келишмовчиликдан кейин Жек Ма муайян вақт омма олдида кўриниш бермаган. У Хитойни тарк этган ёки ҳибсга олинган, деган тахминлар пайдо бўлган, аммо унинг дўстлари тадбиркор мамлакатда эканини даъво қилган. 2021 йил январь ойида Жек Ма уч ой ичида биринчи марта жамоатчилик олдида пайдо бўлди.
Изоҳ (0)