“Apple бош ижрочи директори Тим Кук Пекинга сафари чоғида Хитойга сармоя киритишни кўпайтиришга ваъда берди”, деб хабар беради Sinxua.
Кук бу йил Хитойга иккинчи сафари чоғида мамлакат саноат ва ахборот технологиялари вазири Цзинь Чжуанлун билан учрашиб, Apple компаниясининг мамлакатдаги ривожланиши, онлайн маълумотлар хавфсизлигини бошқариш ва “булутли” хизматлар каби мавзуларни муҳокама қилди.
Apple бош директорининг айтишича, компания Хитойнинг очиқлиги тақдим этган имкониятлардан фойдаланишга интилади ва мамлакатга сармоя киритишда давом этади. Шу орқали ишлаб чиқариш ва таъминот занжирларининг юқори сифатли ривожланишига ҳисса қўшади.
Кук China Mobile раҳбари Янг Жи билан ҳам учрашди. “Икки томон 5G иловалари, мусиқа ва VR видео соҳаларидаги ҳамкорликни янада ривожлантириш, рақамли контент каби соҳаларда мавжуд ҳамкорлик дастурларига асосланиш юзасидан фикр алмашди”, дейилади Хитой телекоммуникация компанияси баёнотида.
Бундан ташқари, Apple раҳбари Пекиндаги талабалар билан учрашиб, улар компания қурилмаларидан мамлакатда қишлоқ тараққиётини қўллаб-қувватлаш учун қандай фойдаланаётгани билан танишди.
“Мен кўрган лойиҳаларнинг барчаси ажойиб. Бугун учрашган талабалар қишлоқ жойларида ўзларининг ишлаб чиқаришларини кўпайтиришга ёрдам бериш учун технологиядан қандай фойдаланишлари мени ҳайратда қолдирди”, деди Кук.
Шунингдек, у Пекин марказидаги Apple чакана савдо дўконига ташриф буюрди ва Хитойнинг Gala Sports ўйин компанияси дастурчилари билан учрашди.
Изоҳ (0)