Alibaba асосчиси ва миллиардер Жек Ма Покистонга сафаридан кейин 30 июнь куни шахсий самолётда Ўзбекистонга ташриф буюрди, деб хабар бермоқда оммавий ахборот воситалари.
Жек Ма дастлаб Непалга, сўнг Покистонга қисқа шахсий ташриф билан келган. Унинг сафари ҳақида Покистон ОАВлари хабар топган. Қайд этилишича, хитойлик бизнес-магнат 29 июнь куни Исломободга қўнган, Лаҳорга ташриф буюрган ва эртасига шахсий самолётда Ўзбекистонга учиб кетган.
Покистонга қисқа сафари давомида 58 ёшли тадбиркор мамлакат расмийлари ва оммавий ахборот воситалари билан гаплашишдан қочган, унинг ташрифи шахсий, деб изоҳланган. Миллиардернинг Покистонга сафаридан ҳатто Хитой элчихонаси бехабар қолган.
Бизнес-магнатга беш нафар хитойлик, бир америкалик ва бир нафар даниялик ҳамроҳлик қилган.
Айни пайтда Жек Манинг Ўзбекистонга ташрифи якунлари ҳақида маълумот йўқ.
Эслатиб ўтамиз, Хитойда технология тадбиркорларига қарши кураш чоғида Жек Ма бир йилга яқин хорижда бўлди, оммага кўриниш бермади. 2023 йилнинг март ойида у ўз ватанига қайтди.
Изоҳ (0)