30 ноябрь куни Хитойнинг Сичуань вилоятида «Титаник» номли Атлантика лайнери нусхаси қурилиши бошланди. Янги «Титаник» очиқ денгизга чиқмайди — у ташрифчилари ўзини 1912 йилги рейс йўловчиларидек ҳис қилиб кўриши мумкин бўлган аттракционга айланади, деб ёзади Meduza.
«Титаник»нинг узунлиги 269 метр бўлган аниқ нусхаси Сичуань вилоятининг Даин округида, бўлажак курорт ҳудудида қурилади. Сичуаннинг денгизга чиқиш йўли йўқ: кема нусхаси дарё қирғоғида қурилади ва уни сувга тушириш режалаштирилмаган. Янги «Титаник», катта эҳтимол билан, 1912 йилда чўкиб кетган кема кўриниши ва интерьерини такрорловчи меҳмонхона бўлади.
Қурилиш ишлари бир миллиард юан (145 миллион доллар)га баҳоланмоқда. Қурилиш айнан қачон якунига етиши номаълум. Атом сувости кемалари ва ҳарбий кемалар ишлаб чиқаришга ихтисослашган Wuchang Shipyard компанияси 2017 йил августига қадар «Титаник»нинг барча қисмларини тайёрлаб бериши, шундан сўнг машҳур кеманинг нусхаси йиғилиши кутилмоқда.
Сичуань вилояти маъмурияти янги аттракцион ёрдамида ҳудудга сайёҳларни жалб қилмоқчи. Қурилишга Тони Блер ва Гордон Браун ҳукуматларида ишлаган британиялик собиқ вазир Питер Менделсон кўмак бермоқда. Қурилишни бошлаш маросимида Менделсон ҳам қатнашди ва қурилишни тарихий воқеа, деб атади. Бу собиқ вазир — Буюк Британияда Хитой манфаатларини фаол илгари сурувчи шахслардан биридир. У ҳатто 2008 йили, бутун дунё бўйлаб Хитой сут маҳсулотлари соғлиқ учун хавфли деган хавотир билан тақиқланган бир вақтда, Хитойда ишлаб чиқарилган қатиқни намойишкорона ичган эди.
Сичуандаги «Титаник»нинг нусхаси — энг машҳур океан лайнерини қайта тиклаш бўйича иккинчи лойиҳа; биринчиси ҳам Хитойда амалга оширилаётган эди. Австралиялик миллиардер Клайв Палмер 2012 йили Хитой кемасозлик портида денгизга чиқиб, узоқ муддатли сафарларда суза оладиган «Титаник»нинг аниқ нусхасини қурдиришни режалаштираётганини маълум қилган эди. Хавфсизлик нуқтаи назаридан ва кемасозликнинг замонавий талабларига мувофиқ, «Титаник II» лойиҳа бўйича оригиналига нисбатан бир неча метрга кенгроқ бўлиши лозим эди.
Лойиҳани ишлаб чиқишга энг кучли титаникшунослар жалб этилди, 2013 йили кеманинг 10 метрлик модели синовдан ўтказилди. Орадан уч йил ўтиб, Палмер молиявий муаммоларга дуч келди ва қурилиш номаълум муддатга қолдирилди. Аслида қурилиш ишлари бошланмаган, боз устига, Палмер танлаган кемасозлик порти техник талаблар бўйича Хитой тарихидаги илк йўловчи лайнерини қуриш учун жавоб бермаслиги юзасидан хавотирлар билдирилган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)