Qirg‘izistonda deputat Meder Aliyev Mehnat kodeksiga anomal issiqlik vaqtida ish vaqtini qisqartirish bo‘yicha norma kiritishni taklif qildi. Bu haqda “AKIpress” xabar berdi.
U xalqaro amaliyotda Mehnat kodekslarida anomal issiqda ish beruvchi qulay sharoit yaratishi, ya’ni ish kunini qisqartirishi kerakligi bo‘yicha norma borligini aytdi.
Bizning kodeksimizda shunday norma bormi?, deya so‘radi u parlament eshituvlarida.
Mehnat, ijtimoiy ta’minot va migratsiya vazirining birinchi o‘rinbosari Muxtorbek Baymurzayev joriy tahrirdagi va taklif etilayotgan loyihada bunday norma yo‘qligini aytdi.
Mutlaqo yo‘qmi? Yoki, ehtimol, qandaydir bilvosita shaklda biror modda bormi?, deb so‘radi Meder Aliyev.
Mehnat qonunchiligini nazorat qilish va tekshirish xizmati direktori Cholponqul Madyarov Mehnat kodeksida ish beruvchi o‘z xodimlarining xavfsiz mehnat sharoitlarini ta’minlashi kerakligi belgilangani haqida javob berdi.
Ikki yil oldin anomal issiq paytida Sog‘liqni saqlash vazirligi bunday hollarda ish beruvchi xodimlarni ichimlik suvi bilan ta’minlashi kerakligi to‘g‘risida buyruq chiqargandi. 50 yoshdan oshgan xodimlar uchun ish kuni 1 soatga qisqartirilgandi. Bu buyruq asosida amalga oshirilgan. Ammo Mehnat kodeksida bu ko‘zda tutilmagan, dedi u.
Aliyev bu normani kiritishni tavsiya etdi.
Bu norma Rossiya va Qozog‘istonda mavjud. U yerda aniq va ravshan ko‘rsatilgan. Dastlab bu masala jiddiy emasdek tuyulishi mumkin, biroq u keksa yoshdagi, yurak-qon tomir tizimi kasalliklari bor ma’lum toifadagi fuqarolarni qamrab oladi, dedi u.
Izoh (0)