Жорий йилнинг январь—сентябрь ойларида республикада 11 минг 333 та (546 гектар) лот мулк ҳуқуқи асосида 315 миллиард 7 миллион сўмга реализация қилинган. Бу ҳақда Макроиқтисодий ва ҳудудий тадқиқотлар институти хабар бермоқда.
Ўрганишлар давомида республикадаги 67 та туман (шаҳар)да мулк ҳуқуқи асосида ер участкалари аукцион савдоларига умуман чиқарилмагани аниқланган.
Жорий йилда ўтган йилнинг шу давридагига нисбатан мулк ҳуқуқи асосида сотилган ер майдонлари ҳажми 3,5 баробаргача, лотлар сони 2,8 баробаргача, ер майдонларини сотишдан тушган маблағлар миқдори эса 3 баробаргача ортган. Бироқ ўртача 1 га ернинг нархи 102 миллион сўмга арзонлашган.
Ижара ва мулк ҳуқуқи билан умумий аукцион савдоларига чиқарилган ерларнинг аксарияти мастер режа талабларига ёхуд ер участкаларидан фойдаланишнинг рухсат берилган турларига мувофиқ эмаслиги уларни мулк ҳуқуқи асосида аукционга чиқариш имкониятини чеклаб қўймоқда, дейилади тадқиқотда.
Қўшимча қилинишича, ер участкаларини мулк ҳуқуқи билан чиқаришда уларнинг бошланғич баҳоси реал бозор қийматидаги нархдан келиб чиқиб эмас, балки амалдаги миллий стандартлар асосида баҳоланиши ер баҳосининг жуда қиммат чиқишига ва уларнинг аукцион савдоларида сотилмаслигига олиб келмоқда.
Изоҳ (0)