Joriy yilning yanvar—sentyabr oylarida respublikada 11 ming 333 ta (546 gektar) lot mulk huquqi asosida 315 milliard 7 million so‘mga realizatsiya qilingan. Bu haqda Makroiqtisodiy va hududiy tadqiqotlar instituti xabar bermoqda.
O‘rganishlar davomida respublikadagi 67 ta tuman (shahar)da mulk huquqi asosida yer uchastkalari auksion savdolariga umuman chiqarilmagani aniqlangan.
Joriy yilda o‘tgan yilning shu davridagiga nisbatan mulk huquqi asosida sotilgan yer maydonlari hajmi 3,5 barobargacha, lotlar soni 2,8 barobargacha, yer maydonlarini sotishdan tushgan mablag‘lar miqdori esa 3 barobargacha ortgan. Biroq o‘rtacha 1 ga yerning narxi 102 million so‘mga arzonlashgan.
Ijara va mulk huquqi bilan umumiy auksion savdolariga chiqarilgan yerlarning aksariyati master reja talablariga yoxud yer uchastkalaridan foydalanishning ruxsat berilgan turlariga muvofiq emasligi ularni mulk huquqi asosida auksionga chiqarish imkoniyatini cheklab qo‘ymoqda, deyiladi tadqiqotda.
Qo‘shimcha qilinishicha, yer uchastkalarini mulk huquqi bilan chiqarishda ularning boshlang‘ich bahosi real bozor qiymatidagi narxdan kelib chiqib emas, balki amaldagi milliy standartlar asosida baholanishi yer bahosining juda qimmat chiqishiga va ularning auksion savdolarida sotilmasligiga olib kelmoqda.
Izoh (0)