Тошкент шаҳрининг Миробод, Андижон вилоятининг Асака, Навоий вилоятининг Қизилтепа ҳамда Хоразм вилоятининг Янгибозор туманларида ер майдонлари олиб беришни ваъда қилган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Миробод туманида фуқаро П.Д. ва бошқалар ўзаро тил бириктириб, фуқаролар А.Д. ва Х.Н.га Оҳангарон давлат ўрмон хўжалигига тегишли ер майдони ҳудудидан узоқ муддатли ижара шартномаси асосида ажратилган 2 гектар ер майдонини фуқаро Ф.Ш.га 61 минг долларга сотишга келишиб, ер майдони ҳужжатларини танишлари ёрдамида унинг номига расмийлаштириб беришини айтиб, олдиндан 20 минг долларни олган вақтида ашёвий далиллар билан ушланган.
Шу каби, фуқаро Н.Т. фуқаро А.П.нинг яқин қариндошига Асака тумани “Ёшлар саноат зонаси” ҳудудидан ажратилган 5 сотих ер майдонини гўёки туман ҳокимлигида ишловчи танишлари ёрдамида унинг номига расмийлаштириб олиб бериши эвазига 20 минг долларни олган вақтида ашёвий далиллар билан ушланган.
Фуқаро Ш.Б. аукцион савдоси орқали сотиб олган Қизилтепа туманидаги 3 сотих ер майдонини ҳамда ушбу ҳудудга туташ яна 4 сотих ер майдонини фуқаро Х.П.га 15 минг долларга сотишга келишиб, гўёки юқори лавозимда ишловчи танишлари ёрдамида ер майдони ҳужжатларини 4 минг доллар эвазига расмийлаштириб беришини ваъда қилиб, жами 19 минг долларни олган вақтида ашёвий далиллар билан қўлга олинган.
Шунингдек, фуқаро Н.А. фуқаро А.Б.нинг ишончига кириб, унга Янгибозор тумани “Халқобод” массивида жойлашган ҳокимлик захирасидаги 6 сотих ер майдонини гўёки кадастр бўлимида ишловчи танишлари ёрдамида расмийлаштириб олиб бериши эвазига 1 000 доллар ва 17,5 млн сўмни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)