Янги Тошкент шаҳри қурилиши учун Юқори Чирчиқ туманидан яна ер майдони ажратилди. Бу ҳақда вилоят ҳокимлиги матбуот хизмати хабар берди.
Вилоят ҳокимининг тегишли қарори билан Юқори Чирчиқ туманидан давлат захирасига қайтарилган ҳамда тоифаси ўзгартирилган 110,4 гектар ер майдони доимий фойдаланиш ҳуқуқи билан Янги Тошкент шаҳрини барпо этиш дирексиясига ажратиб берилди. Туманнинг “Ўзбекистон”, “Гулистон”, “Истиқлол” маҳаллаларидаги ҳудудлар Янги Тошкент шаҳри ҳудудига ўтказилмоқда.
Қайд этилишича, Давлат кадастрлари палатаси вилоят бошқармаси томонидан мазкур ер майдонларини белгиланган тартибда кадастр ҳужжатларини расмийлаштириш ва давлат рўйхатидан ўтказиш ишлари амалга оширилмоқда.
2023 йилнинг март ойида Янги Тошкент шаҳрининг қурилишига тамал тоши қўйилган эди. 2024 йил апрелида бу ерда илк иншоотлар қурилишини бошлаш маросими бўлди.
2023 йилнинг июлида “Янги Тошкент шаҳрини барпо этиш чора-тадбирлари тўғрисида”ги президент қарори қабул қилинган. 500 минг аҳолига мўлжалланган Янги Тошкент шаҳри Чирчиқ ва Қорасув дарёлари оралиғида барпо этилади. Янги Тошкент лойиҳасини амалга ошириш учун танлаб олинган ҳудуд — денгиз сатҳидан 500 метр баланд бўлиб, шаҳарга яқинлиги, ўз иқлими, баҳаволиги ва икки дарё ўртасида жойлашгани билан ноёб ҳисобланади.
Давлат раҳбари 2023 йил сентябрида Янги Тошкент шаҳрининг бош режаси лойиҳаси билан танишганида Янги Тошкент “ақлли” ва “боғ шаҳар” бўлишини айтганди. Давлат идоралари босқичма-босқич Янги Тошкентга кўчиб боради.
Изоҳ (0)