Тошкент вилоятида “аукцион ўйинлари” орқали ер олиб бериш учун 1,5 млн доллар талаб қилган шахс қўлга олинди

Тошкент вилояти Қибрай туманида 26 август куни тезкор тадбир ўтказилди. Бу ҳақда Ички ишлар вазирлиги матбуот хизмати хабар берди.

Маълум қилинишича, ўтказилган тезкор тадбирда Бўстонлиқ туманидаги Яккатут маҳалласидан 3,5 гектар ҳокимлик захирасидаги ер майдонини “аукцион ўйинлари” ёрдамида олиб беришни ваъда қилган шахс қўлга олинди. Мазкур шахс ҳужжатларни расмийлаштириб бериш эвазига 1,5 млн доллар талаб қилган ва бўнак сифатида 50 минг доллар олган вақтида ушланган.

Шунингдек, Қибрай туманида яшовчи икки нафар фуқаро Бўстонлиқ тумани давлат захирасидаги 1,2 гектар қишлоқ хўжалиги экин ер майдонини 384 минг долларга сотишга келишган. 

Улар юқори лавозимда ишлайдиган танишлари орқали ерни расмийлаштириб беришни ваъда қилиб, 20 минг долларни бўнак тарзида олган вақтида ушланган.

Икки ҳолат бўйича ҳам жиноят иши қўзғатилган, тергов ҳаракатлари олиб борилмоқда.