Қарши шаҳри ҳокими, прокурор ва ИИБ бошлиғи тадбиркор аёлга тегишли бинони суд қарорисиз буздирди. Бизнес омбудсман мансабдорларга чора кўришни сўраган 

Қарши шаҳри ҳокими Нормўмин Холбоев бошчилигидаги “учлик” тадбиркор аёлга тегишли бинони суд қарорисиз буздирди. Бизнес омбудсман бу бўйича вилоят прокуратурасига мурожаат қилиб, мансабдорлар ноқонуний хатти-ҳаракати учун жавоб бериши кераклигини сўради. “Дарё” мазкур ҳолатни ўрганди. 

“Отчопар” маҳалласидаги қаровсиз ер аукционга қўйилгач, 5 та лотни ютиб олиб, маиший хизмат кўрсатиш шохобчаси ташкил қилгандик. Тадбиркорликка бемалол, иккиланмасдан пул тикканимиз президентимизнинг тадбиркорларга яратиб бераётган имкониятлари сабаб эди. Лекин афсуски, Қарши шаҳри ҳокими, прокурори ва ИИБ бошлиғи ўзбошимчалик билан мен қурган бинони бузиб ташлади, — дейди тадбиркор Нигора Ҳамидова. 

Суҳбатдошнинг айтишича, у маиший хизмат кўрсатиш шохобчасини барпо этиш учун 750 миллион сўм маблағ сарфлаган. 

“Ерни аукционда сотиб олгач, енгил типда бино қуришдан аввал лойиҳа-сметасини қилдик ва бино 750 миллион сўмга баҳоланди. Шундан сўнг, қурилиш ишларини бошлаб, қисқа фурсатда тугатдик. Фаолият бошлашимизга бир ҳафта қолганда Қарши шаҳридаги раҳбарлар зўравонлик билан бузиб ташлашди”, дейди у. 

Нигора Ҳамидованинг “Дарё”га тақдим қилган ҳужжатларига кўра, у ерни аукцион савдодан сотиб олаётган пайтда фаолияти кўчма савдо орқали амалга оширилиши белгиланган бўлиб, Қарши шаҳар давлат солиқ инспекцияси талаблари қўйилган. Бироқ тадбиркор кўчма савдо қилиш талабини бузган. 

“Қурилишимиз битиб, фаолият юритишимизга бир ҳафта қолганда архитектура, кадастр, ҳокимият ва прокуратурадан вакиллар келиб, бу ерда қурилиш қилмаслигим кераклиги, бу бинони бузишим лозимлигини тушунтирди. Шундан сўнг, мен бу ишни қонуний ҳал қилишимиз кераклигини, судга беришса, ноқонуний иш қилган бўлсам, жавоб беришимни айтдим. Кейин далолатнома тузишди ва мазкур бинони 15 кун ичида ихтиёрий бузиб ташлашим кераклигини, йўқса судга беришлари мумкинлиги, суд қарори билан бузилишини айтиб, огоҳлантиришди. Ўшанда мен ҳақлигим учун қўрқмадим ва судга беришлари мумкинлигини билдирдим. Боиси, ер меники эди, уни аукциондан сотиб олгандим. Аммо 15 кунлик муддат ўтмасдан, 15 февраль куни Қарши шаҳри ҳокими, прокурори ва ИИБ бошлиғи ҳудудга келиб, ҳеч қандай ҳужжатларсиз, суд қарорисиз бинони бузишди”, дейди тадбиркор. 

Нигора Ҳамидованинг қўшимча қилишча, бузиш жараёнлари шахсан Қарши шаҳри ҳокими Нормўмин Холбоев бошчилигидаги шаҳар прокурори, шаҳар ИИБ бошлиғи иштирокида Ободонлаштириш бошқармаси ходимлари томонидан амалга оширилган.

“Ўша куни сёмка қилганим учун телефонимни тортиб олиб, ичидаги видеоларни ўчиришди. Атрофдагиларга тасвирга олишга рухсат берилмади. ИИБ бошлиғи эса эътироз билдирганимга жавобан, кимгадир топшириқ бериб, мени қамаб қўйишни буюрди. Шаҳар прокурорига қонуний иш қилинишини назоратга олинг, суд қарорисиз бинони бузишга ҳаққингиз йўқ деб тушунтирсам-да, мени ҳеч ким эшитмади. Барча мол-мулким, 750 миллион сўмлик қурилиш материалларим йўқ бўлди”, дейди шикоятчи тадбиркор. 

Тадбиркорнинг айтишича, у хатти-ҳаракатини қонуний деб билган. 

“Агар ишим ноқонуний бўлганда, ерни ноқонуний эгаллаб олиб, қурилиш қилганимда шунча огоҳлантиришдан сўнг, ўзим билиб, айбимни тан олиб, бузиб олардим. Ва қилинган харажатимга куймаслик учун ҳам ўзим бузиш ишларини якунлардим. Ҳозир мол-мулким талон-торож қилинди”, дейди мурожаатчи. 

Тадбиркор у қурган бино ноқонуний деб бузилганини, аммо бино атрофи ўралган девор эса ҳамон бузилмаганини айтмоқда.

“Ҳоким, прокурор ва ИИБ бошлиғи бузиш ишларини олиб боргач, ҳозирда ер ўша эски ҳолатига қайтди. Ташландиқ, тикан босган ва қаровсиз ҳолатига. Мен қурган бино нотўғри экан, нега бино атрофи ўралган девор ҳамон бузилмаган? Мен қурган бино уларга халал беради-ю, қабристонни ёпиб турувчи, ташландиқ жойларни яшириб турувчи девор керакми? Мен шу ерда фаолият юритиб, атрофни яшил маконга айлантирсам, тартибли савдо қилсам нимаси ёмон? Ҳозир шифохонага кириш эшигининг тагида ноқонуний ёйма савдо авжига чиққан. Шаҳар масъулларига шу керакмиди?”, дейди тадбиркор.

Қарши шаҳар ҳокимлиги ахборот хизматининг “Дарё”га билдиришича, бу қурилиш фуқаро томонидан ўзбошимчалик билан ноқонуний қурилган. 

“Тадбиркорга кадастр агентлиги томонидан бино қурилишидан олдин ҳам огоҳлантириш берилган. Қарши шаҳар кадастр агентлиги томонидан жарима ҳам қилинган. Пойдевор буздирилган, лекин тадбиркор қонунни қасддан бузиб яна қурилишни давом эттирган”, дейди ҳоким ҳаракатига изоҳ берган Қарши шаҳар ҳокимлиги ахборот хизмати раҳбари. 

Тадбиркор Нигора Ҳамидова эндиликда тадбиркор сифатида Қарши шаҳрида фаолият юритиб, бирор бир соҳага 100 минг сўм инвестиция тикишга ҳам қўрқиб қолганини, имкони бўлса хорижга чиқиб, тадбиркорлигини давом эттирмоқчилигини баён қилмоқда.

Тадбиркор ҳуқуқини ҳимоя қилаётган адвокат Ойбек Раҳимовнинг маълумот беришича, Иқтисодиёт ва молия вазирлиги ҳузуридаги кадастр агентлигининг Қарши шаҳар бўлими бошлиғи судга тақдимнома киритиб, 2024 йил 14 февралдаги баённомага кўра, Нигора Ҳамидова ноқонуний қурилиш олиб борган дея, уни маъмурий жавобгарликка тортишни сўрайди. Бироқ, суд бу тақдимномани қаноатлантиришни рад этади. Мазкур иш бўйича суд давом этмоқда.

“Дарё” мавзуга қайтади.