Мудофаа вазирлигининг Қишлоқ хўжалиги маҳсулотларини етказиб бериш хизмати, Тошкент ҳарбий округи қўшинлари қўмондонлиги ҳамда 71201-ҳарбий қисм масъуллари деҳқонга берган ваъдасидан тониб, у билан тузилган шартнома шартларини бажармади. Бу ҳақда “Дарё”га мурожаат қилган фермер ва деҳқон Чори Шойимов гапириб берди.
2020 йилда Мудофаа вазирлигига қарашли ҳарбий полигондан 1940 гектар ер майдонини шериклик асосида ижарага олганман. Президент қарори билан бўш ётган ерлардан унумли фойдаланиш имконияти йўлга қўйилди ва чорвачилик, деҳқончиликка берила бошланди. Айни мақсадда шунча ерни олиб, лизингга 2 миллиард сўмга яқин маблағга техника сотиб олдик. Ишга туширилмаган ерни экинга тайёрладик. Ўзлаштирдик, дейди мурожаатчи Чори Шойимов.
Деҳқоннинг айтишича, у Мудофаа вазирлиги масъуллари билан 2020 йил 22 июнь куни 9-сонли шартнома тузиб, лалми ерларга буғдой, арпа, нўхат, масхар каби экинларни экиб келган.
Бу ерлар сув ичмайдиган лалми ерлар бўлгани учун Жиззах ва Қашқадарё вилоятларидан лалми ерда ўсувчи буғдой, арпа, нўхат каби экинларни олиб келиб экдик. Уч йил давомида ердан даромад олиш баробарида ижара шартномага кўра, даромаднинг учдан бир қисмини Мудофаа вазирлигига топшириб келдик. Шартномада нима кўрсатилган бўлса, тўлиқ бажардик, дейди мурожаатчи.
Мурожаатчининг айтишича, 2022 йилнинг ноябрь ойида Мудофаа вазирлиги масъуллари, айнан Мурод Худойберганов бошчилигидаги ходимлар фуқаронинг 500 бош қорамолини қамаб қўйиб, ердан чиқиб кетишни талаб қилган.
2022 йилнинг ноябрь ойларида 500 бош чорвамни қамаб қўйиб, бу ердан мени мажбурлаб чиқариб юборишди. Ва бу ерларни New platinum construction деб номланган корхонага бериб юборди. Аслида 2020 йил 22 июнда тузилган шартномамнинг муддати 2035 йилгача бўлишига қарамасдан улар ерни олиб қўйди. Агар қўшимча шартлари бўлганда ва уларнинг талаби қонуний бўлганда мени музокара столига чақиришлари керак эди. Мен шу пайтгача айтилган топшириқни бажариб, нафақат ўзим даромад қилдим, вазирликка ҳам улуш бериб келдим. Буни тасдиқловчи ҳужжатларим бор, дейди шикоятчи.
“Шайимов Қарши” хусусий корхонаси раҳбарининг айтишича, ҳарбийлар ваъдасидан қайтгач, у судга шикоят қилган. Чирчиқ туманлараро иқтисодий суди 2024 йилнинг 14 март куни мазкур муаммони кўриб чиқиб, даъвогар Чори Шойимов талабини тўлиқ қаноатлантирган. Шунингдек, жавобгарлар — 71201 ҳарбий қисм, New platinum construction МЧЖ, Тошкент ҳарбий округи қўшинлари қўмондонлиги, Мудофаа вазирлиги Қишлоқ хўжалиги маҳсулотларини етказиб бериш хизматига деҳқоннинг 2020 йил 22 июнда тузилган 9-сонли шартномадан тўлақонли фойдаланишга тўсқинлик қилмаслик мажбуриятини юклаган. 71201 ҳарбий қисм ҳисобидан даъвогар фойдасига 1 миллион 700 минг сўм давлат божи ва 34 минг сўм почта харажатини ундиришни белгилаган. Бироқ айни кунгача мазкур қарори ижроси таъминланмаган.
“Дарё” мурожаатчининг биргина даъвосини олиб чиқди. Боиси Мудофаа вазирлигига қилинган журналистик сўровга вазирлик ахборот хизмати ҳозирча тайинли жавоб бермади. Масъуллар мазкур муаммо юзасидан 27 октябрдаги сайловлар ўтгач, батафсил маълумот беришини қўшимча қилди. Шу сабабдан “Дарё” ушбу мавзуга яна қайтади.
Изоҳ (0)