Наманган вилоятининг Тўрақўрғон ҳамда Учқўрғон туманларида ер майдонларини сотмоқчи бўлган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Тўрақўрғон туманида фуқаро И.М. турмуш ўртоғи Ю.Н.нинг номига аукцион орқали харид қилган “Обод намуна диёри” массивида жойлашган 1 гектар ер майдонини фуқаро Ш.Х.га фирибгарлик йўли билан 10 минг долларга сотишга келишган.
Сўнг унинг номига ҳужжатларини расмийлаштириб беришини айтиб, келишилган пуллар ҳисобидан 6 900 доллар ва 15 млн сўмни олган вақтида ашёвий далиллар билан ушланган.
Шунингдек, Учқўрғон туманида “Қ.С.” МЧЖнинг Учқўрғон филиали раҳбари М.А. МЧЖга қарашли 8 сотих ер майдонини фуқаро Г.Б.га гўёки юқори лавозимда ишловчи танишлари ёрдамида унинг номига кадастр ҳужжатларини тайёрлатиб сотишини ваъда қилган.
Бунинг эвазига 5 500 долларни фирибгарлик йўли билан олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Тошкент вилоятида “аукцион ўйинлари” орқали ер олиб бериш учун 1,5 млн доллар талаб қилган шахс қўлга олингани ҳақида хабар берилганди.
Изоҳ (0)