Қозоғистонда ҳукумат билан ноқонуний контентни ўчириш бўйича ҳамкорлик қилиш мақсадида Telegram компанияси офиси очилади. Бу ҳақда “ТАСС” хабар берди.
Қозоғистон рақамли ривожланиш, инновациялар ва аэрокосмик саноат вазири Жаслан Мадиев АҚШ Савдо палатаси ва йирик Америка компаниялари вакиллари билан учрашди.
“Биз, шунингдек, ноқонуний контентни тезкор олиб ташлаш ва зарарли каналларни блоклаш мақсадида Telegram билан фаол ҳамкорлик қилмоқдамиз. Қонунчилигимизга кўра, Telegram, WhatsApp ва TikTok каби интернет платформалари энди Қозоғистонда ўз вакилига эга бўлиши шарт. Telegram билан уларнинг вакилини тайинлаш ва офис очиш бўйича келишувга эришилди — бу контент устидан назоратни кучайтириш йўлидаги муҳим қадам, дея Мадиевнинг сўзларини келтирмоқда вазирлик матбуот хизмати.
Учрашувда Apple ва Meta компаниялари вакиллари ҳам иштирок этган. Мадиев “Фирибгарлик схемаларига қарши курашиш бўйича Meta билан ишлаш бошланаётганини” айтган.
“Meta вакилларининг таъкидлашича, Қозоғистон дуч келаётган интернет фирибгарлиги кўплаб мамлакатлар учун умумий муаммодир. Охирги чоракда Meta сунъий интеллект технологияларидан фойдаланган ҳолда бутун дунё бўйлаб 1,2 миллиард сохта аккаунтларни блоклади”, дейилади хабарда.
Изоҳ (0)