Bloomberg агентлиги жаҳондаги энг нуфузли 50 кишининг рўйхатини эълон қилди. «Nur.kz»нинг қайд этишича, рейтингдан асосан иқтисодчилар ва йирик компанияларнинг раҳбарлари ўрин олган.
Биринчи ўрин АҚШ Федерал захира тизимига бир ярим йилдан бери раҳбарлик қилиб келаётган Жанет Йелленга насиб этди. Иккинчи ўринни Хитой раҳбари Си Цзиньпин эгаллади. Даромадлари нуфузи каби ошиб бораётган Apple компаниясининг раҳбари Тим Кук эса рўйхатда учинчи бўлди.
Рўйхатдаги кейинги ўринлардан BlackRock компанияси асосчиларидан бири Ларри Финк, жаҳоннинг энг бадавлат кишиларидан бири Уоррен Баффет, АҚШ президенти Барак Обама, Icahn Enterprises раҳбари Карл Айкан, Goldman Sachs бошлиғи Ллойд Бланкфейн Германия канцлери Ангела Меркель ва LinkedIn асосчиларидан бири Рейд Хоффман жой олган.
Шунингдек, рўйхатдан Ҳиндистон бош вазири Нарендра Моди (13-ўрин), Европа марказий банки раҳбари Марио Драги (14-ўрин), Tesla асосчиси Илон Маск (25-ўрин), Toyota президенти Акио Toyota (29-ўрин), Рим папаси Франциск (31-ўрин) ҳам жой олган.
Маълумот учун, Bloomberg агентлиги жаҳоннинг энг нуфузли одамлари рўйхатини 2011 йилдан бери эълон қилиб келади.
Изоҳ (0)