“Мигрант.uz” Москвага киритилмаган 30 га яқин ўзбекистонлик Шереметьево аэропортида қолаётгани ҳақида хабар берган эди. Унда айтилишича, уларга бериладиган кунлик овқатлар тўхтатилгани, кутиш залидаги ўриндиқларда ётишгани, ватанга қайтариб юборилиши кечиктирилаётгани айтилган.
Аэропортга қамалиб қолган муҳожирлар Ўзбекистоннинг Москвадаги консуллигига қўнғироқ қилиб ёрдам сўрашган, аммо умумий жавобдан бошқа ҳеч қандай жавоб ёки ёрдам бўлмагани қўшимча қилинган.
Ҳолат юзасидан Ўзбекистон Ташқи ишлар вазирлиги ахборот хизмати “Дарё”га изоҳ берди.
Бу масалада Ўзбекистоннинг Россиядаги элчихонаси консуллик бўлими ходимлари Шереметьево аэропортига боришган ва вазиятни ўрганишган. Ҳақиқатан ҳам у ерда Ўзбекистон фуқаролари борлиги ва уларга Россия Федерациясига киришга тақиқ қўйилгани аниқланган. Ҳозирги кунда Россияга кириш қонун-қоидалари анча кучайтирилган бўлиб, текширувлар ва суҳбатлар олиб борилмоқда, дейилади вазирлик ахборотида.
Қўшимча қилинишича, аэропортда қолиб кетган ўзбекистонлик фуқароларнинг барчаси 14-15 август кунлари ватанга қайтган.
Ташқи ишлар вазирлигининг эслатишича, Ўзбекистон фуқароларига қандайдир муаммо ёки масала бўлса, қуйидаги рақамларга алоқага чиқишлари мумкин:
- Ўзбекистоннинг Москвадаги элчихонаси консуллик бўлимининг Call-маркази: +7 (499) 238-36-20; +7 (499) 230-00-76.
- Ўзбекистон Ташқи меҳнат миграцияси агентлигининг Москва шаҳридаги ваколатхонасига. Алоқа рақами: +7 (925) 045-47-44; +7 (903) 010-13-38.
Изоҳ (0)