Россия Хавфсизлик кенгаши раиси ўринбосари Дмитрий Медведев мамлакатга мавсумий иш учун келган муҳожирларга ўз оиласини олиб келишни тақиқлашни таклиф қилди. Бу ҳақда “ТАСС” хабар берди.
Сиёсатчининг сўзларига кўра, муҳожирларнинг қолишини чеклаш “мигрант оилалари, анклавлар”га тегишли бўлиши керак.
“Биз, албатта, индивидуал тенденцияларни бартараф эта олмаймиз, лекин нима қилиш мумкин: агар бирор киши мавсумий иш учун келса, нега у оиласини ўзи билан судраб юради?”, деди у.
Бундан ташқари, сиёсатчи Россияда бўлиб турган ва рус тилини билмайдиган меҳнат муҳожирларининг болаларига таълим муассасаларига боришни тақиқлаш кераклигини айтди.
“Аста-секин, қўполлик қилмасдан, лекин уларни тил ўрганишга мажбурлашимиз керак. Бола мактабга келганда, баъзи синфларда ўқувчиларнинг тўртдан уч қисми, айниқса, биринчи синф болалари рус тилида гапира олмаслиги мумкин эмас”, деди Медведев.
Аввалроқ Давлат думаси раҳбари Вячеслав Володин меҳнат муҳожирлари оилаларининг Россияга кўчиб ўтишини тақиқлаш тарафдори бўлганди. У “паст малакали муҳожирлар”га оиласини олиб келиш имконини берувчи муаммони ҳал қилишга чақирган.
Изоҳ (0)