Минтақа давлатлари турли баҳоналар билан афғон фуқароларига ёмон муносабатда бўлмоқда, дея Афғонистон қочқинлар ва репатриация ишлари бўйича вазир в.б. Ҳалил Раҳмон Ҳаққоний хабар берди.
“Халқимиз ҳеч қайси давлатнинг ички ишларига аралашмайди ва қўшни давлатлар уларни ҳайдаб чиқаришни бас қилиши керак”, деб тушунтирди у.
Ҳаққоний давлатларни ҳамдардлик кўрсатишга чақирган.
Сентябрь ойида Эрон ҳуқуқ-тартибот кучлари раҳбари Аҳмад Ризо Радан 2025 йилнинг март ойи охиригача Эронда ноқонуний яшаётган 2 миллионга яқин афғон фуқаросини чиқариб юбориш режасини эълон қилган эди. Мазкур режа мамлакатда афғонларга қарши намойишлар ва Эрон ички ишлар вазири Искандар Момайнийнинг “мамлакатда ноқонуний қочқинларнинг мавжудлиги нафақат ижтимоий зарар етказиши, балки маҳаллий аҳолининг иш жойларини ҳам тортиб олаётгани” ҳақидаги баёнотлар фонида эълон қилинган.
Январь ойида Кобул Исломободдан афғон муҳожирларига нисбатан “шафқатсиз муносабат”ларни тўхтатишни сўраган.
“Покистон ҳукуматининг афғон қочқинларига нисбатан бундай муносабати бошқа мамлакатларда ҳам умидсизлик ва қаршиликларга сабаб бўлмоқда”, деган эди Афғонистон муваққат ҳукумати раҳбари Муҳаммад Ҳасан Охунд Кобулда Покистон делегацияси билан учрашувда.
Октябрь ойида Ўзбекистондаги болалар ва ўсмирлар аҳволининг глобал вазият таҳлили тақдимоти чоғида UNICEF вакиллари республикадаги минглаб афғон қочқинлари қонун доирасидан ташқарида қолаётганини таъкидлаган. Унга кўра, бу рўйхатдан ўтиш ва виза олиш, уй-жой, озиқ-овқат ва соғлиқни сақлаш билан боғлиқ муаммоларни келтириб чиқаради. Шу билан бирга, ҳисоботда қайд этилишича, Ўзбекистон расмийлари бошпана ҳақидаги биринчи қонун лойиҳасини тайёрлашга киришган.
Яқинда Европа иттифоқи Афғонистондан келган барча аёлларга бошпана беришини маълум қилган эди. Бу бир қатор европалик экспертларнинг хавотирига сабаб бўлган, улар ушбу ташаббусни қаттиқ танқид қилган ва ижтимоий ёрдам катта сармоя талаб қилишини ҳамда аёллардан кейин уларнинг оилалари охир-оқибат ЕИга келиши мумкинлигидан огоҳлантирган.
Изоҳ (0)