Италия ҳукумати БМТнинг фаластинлик қочқинларга ёрдам берувчи агентлиги (UNRWA)ни молиялаштиришни янгиламоқда, дея Deutsche Welle хабар берди.
Италия ТИВ раҳбари Антонио Тажани Римда Фаластин миллий маъмурияти бош вазири Муҳаммад Мустафо билан учрашувдан сўнг ҳукумат Фаластин аҳолиси учун жами 35 миллион евро миқдорида маблағ ажратганини маълум қилган. Шу билан бирга, ушбу маблағнинг 5 миллион евроси UNRWA’га юборилади.
Терроризмни қўллаб-қувватлаш учун бир сент ҳам кетмаслиги учун қатъий назорат керак, — деб таъкидлади Тажани.
Январь ойида Италия, Германия ва Европа Иттифоқининг бошқа давлатлари, шунингдек, АҚШ, Канада, Австралия ва Япония ташкилот ходимларининг ҲАМАСнинг Исроилга ҳужумига алоқадорлиги ҳақидаги хабарлар ортидан UNRWA’ни молиялаштиришни тўхтатган эди. Январь ойида Исроил расмийлари БМТ раҳбариятига ҲАМАСнинг Исроилга ҳужумида UNRWA’нинг 12 нафар ходими иштирок этгани ҳақида маълумот берган. Буни кейинроқ Бирлашган Миллатлар Ташкилоти бош котиби Антонио Гутерриш ҳам тасдиқлаган.
Агентлик ҳужумга алоқадор ходимларнинг шартномаларини бекор қилган ва тергов ўтказишга ваъда берган. Кейинчалик, Франциянинг собиқ ташқи ишлар вазири Кетрин Колонна бошчилигидаги БМТнинг Яқин Шарқ агентлиги фаолиятини текширган комиссия унинг фаолиятининг “мустақиллиги билан боғлиқ бир қатор муаммоларни” аниқлаганини маълум қилди. У, шунингдек, UNRWA бетарафлик тамойилига риоя этилишини таъминлаш учун бир қатор механизмлар яратганини айтган.
Март ойи бошида Канада ва Швеция UNRWA’га ёрдамни қайта тиклаган ва бу қадамни Ғазодаги оғир гуманитар вазият билан изоҳлаган.
Изоҳ (0)